Ka sorkar jylla da smat bha ko wow pynkrehkaam ya ka Jal Jeevan Mission (JJM) hapoh ka jylla heiwa u Montri ka chnat PHE, u Marcuise N Marak da pynbna u wa i kreh ya ka JJM dadep la kamwa 56.39%.
Hawa yaklam wa kiwa pathai khubor u Marak da ong u wa em kattu katni ki District nei thut i rukom saam bordiñ da thut i rukom krehkaam tangwa da kular u wa daw pynbiang ya ka bordiñ katkam wa emkaam.
Da pyntip u leh wa chisien wa da biang liang wanang, sa kamwa 80,000 tylli ki manyung wow myntoi na ka JJM neibhah i kreh boon toh iwa da jan dep. Kini ki manyung toh kiwa em ha East Khasi Hills, East wa West Jaiñtia Hills, ki bynta ka South West Khasi Hills wa ki District ka Ri-loom Garo.
Hawa kylli chooh chooh da ong u wa ka thong toh wow pynpoi umkor cha ki 6,51,556 tylli ki manyung wei katni em 3,67,447 tylli wa yoh umkor weiwa ka sorkar India da booh por ko hadooh ka 26 Duyatra (Jan) 2024 wow pyndep yeini.
Heipor wa wan sylli u Montri ka sorkar pyrdi wa pait ya ka Jal Shakti, u Gajendra Singh Shekhawat da yaroh u yei rukom pynkreh ya ka Jal Jeevan Mission (JJM) hapoh ka jylla.
Ha ka 1 tarik Naitung (Apr) ka sorkar India da pynlait ko sa kamwa T. 299.24 klur wow pynkrehkaam ya ka Jal Jeevan Mission (JJM) ha Meghalaya neibynta u 2022-23 heiwa kani ka poisa toh kawa e pyntam ya ka jylla wow pynpoi umkor cha waroh ki manyung neidaw wa da lehbha yei pynkrehkaam ya kani ka Scheme.
Discussion about this post