U montri rangbah ka jylla Meghalaya u Conrad K Sangma da sdang u ya ka thong wow sdang pynkhai biang yaka khayi pateiñ, ki khih ki khan kiwa da sangeh nadooh wa em ka khlam COVID-19. Ya kani da e pyrtuid kam ka ‘Restart Meghalaya Mission’ kawa da sdang ynnin ka 15 tarik kam chibynta ka sngi laitlooid ka ri
Ka wi na ki thong toh wow e yei kyrchaan cha ki warep, ki bru wa seiñ khih yow ye ki u pynkhlan pynskem ya iwa emkaam ki yow im. Ya kani ka thong namo ka Mission kawa da khut Restart toh i thmu yong ka wow pynsdang biang yaki kaam kiwa da sangeh wei da ka sorkar u pynlut ko T. 14,515 klur ha ki 3 snem heiwa ha uni u snem da booh thong T. 7,839 klur, da pyntip u Conrad.
Da booh T. 850 klur wow chna ya ki 13 tylli ki sarok kiwa emkaam bha kiwa jrong 350 Km. Yaka Jowai waka Tura u pynkylla cha ki Smart Town deiwa pynlut mar T. 50 klur.
Sa kawi ka thong wa da chem hadien wa em ka khlam toh wa emkaam wow pynkhlan u pynmih yaki mar rep yow ye u psa pyn da i ya i hi kamjooh yow pynlai yaw yaki mar rep wa kiwi kiwa kam kini ki jait.
U Conrad da pyntip u leh wa kam chibynta wow yarap ya ki khih ki khan kiwa khian (Small business), ka sorkar daw e yarap ko da ka Grant hadooh T. 10,000, ya ki khih wa dang sdang u e yaka ram hadooh T. 50,000. Heiyatoh wa ini da pynkhreh T. 15 klur kam ka Corpus Fund.
“Kani ka khlam lyngba ki Lockdown da ktah bha ko yaka kaam khayi pateiñ wei ka Lockdown ym toh kawa ye wow pynbait ya ini i kaam katwa dang lai ki por. Emkaam ya i kam ki bru wow pynkylla noh i yei rukom im deiwa bood yaka Social Distancing, wow deiñ yaki Mask, u sait yaki kti wei wow man kiwa emakor ha wa ka’oh. Deiwa leh ya kini kiwa emkaam, daw ye i wow pteiñ wow im deiwa ye leh wow leh yaki kaam, ki khih ki khan deiwa yada ya idæ kamjooh ya kiwa yajan wa i.
Heiyatoh waka puræ puthi, da pyntip u wa i chna yaki 13 tylli ki Ekalavya Model School u sdang noh wei da em sa 25 tylli ki skur kiwa dang yoh bor wow chna. I chna yaki 4 tylli ki Polytechnic ha Ri Bhoi, West Khasi Hills, South Garo Hills wa East Garo Hills da jan dep. Da e leh mar T. 12 klur yow pynchna pynmiat yaki Degree College ha Baghmara, Sohra wa Williamnagar.
Daw saam leh yaki Tablet cha 25,000 ngut kiwa puræ Class XI hapoh Meghalaya.
U montri rangbah da pyntip u wa da dep wow leh yei pynkhreh wow pynlut T. 352 klur niebynta ki kaam wa yatoh wa i chiat i khiah ha kini ki 4 snem. T. 75 klur u pynlut ha uni u snem yow pynbha pynmiat yaki PHC waki CHC.
