Hei yañia hajrong i pynduna ya i khynnia kari ha Shillong ynne ka sngi, u khlieh ka Voice of the People Party (VPP), u Ardent Miller Basaiawmoit da e buit u wow dam u e NOC yow lait u mih ki skur thymme hapoh sor wei du itæ donhi ka laad heiyatoh wa ini.
Tangwa neiliang u Montri Rangbah, u Conrad K Sangma da jubab u deiwa ong wa ka sorkar da sdang ko ya ka STEMS (Sustainable Transport and Efficient Mobility Society) Programme wow pynkrehkaam lang ya ki School Bus ha Shillong yow yarap pynduna yei khynnia kari.
Da ong u wa ini i e buit u Ardent leh ye hi u pdiang tangwa emkaam u sñiawthooh leh wa i stat i tip leh man iwa emkaam neibhah ki bru leh dang boon ki kat dang mih ki sngi.
Chooh chooh da ong u wa i stat i tip leh man iwa kordor wei emkaam u pait salonsar neibynta ki khynnah wei ki skur leh toh u man ki kiwa ye ki khynnah u lai.
U Conrad da ong u leh wa i e bor wow sdang ya ka skur ye u rap pynkhor ya ki kyndon deiwa phah wow em ki ya i thaw wa biang wow pynyieñ kari wa kiwi kiwi ki bynta.
Heijooh i por da ong u wa daw thooh ki laad wow pynbait ya ini waroh chwa wow chim ya ka rai wei u khang wow sdang ki skur ymtoh iwa miat wow leh tangwa daw pyrkhat yeini waroh.
