Shillong: “Chi tadong i drok wa thap ha ka tin Golden chongdor i kamwa T. 8,000 katwa ya kiwa song lyngkhot won chongdor i kamwa T. 300” ong u Superintendent of Police ka Shillong City u Vivek Syiem hawa klam u ha ka e sikai pynsñiawthooh ya i ma ki drok wa pynman ynnin ka sngi ha Jaiaw Madan Student da ka KSU Jaiaw Circle.
Da ong u leh wa da chem u ya ki khynnah kiwa dang 12 snem i rta kiwa da sdang u dih drok. “I dih drok da pynmih ko ya kiwa boon ki kaam tooh neidaw wa kiwa dih drok emkaam poisa ki wow thied drok,” da ong u Vivek.
Da ong chooh chooh u wa i toh u yait i na u drok neibhah man u uwa smat u kdoh u khoom wei da kyntu u ya kiwa sikai, ki bei ki pa kamjooh ya ka seiñ KSU wow kreh chitom ki wow pyndooh jait noh ya ini jait dih.
Ha kani ka sngi neiliang ka KSU da pynman ko ya ka lai paidbah nadooh ka Community Hall ka Jaiaw Lumpyllon heiwa da emlang palat 15 tylli ki skur wa kynthup ya ka MLCU kawa da pynkut ha Madan Student Jaiaw.
Neiliang yong ki khynnah skur kiwa lai paidbah ha kani ka sngi da kbai ki ya ki wyrta pyrchah kiwa khayi drok neibhah ki booh ya ka jaitbru ha i maa wa joor bha.
Waroh kiwa klam ha kani ka sngi da pynsñiaw ki yei sñiawsih yong ki yei roi kiwa dih drok ha ki dong ki chnong wei da kyntu ki ya ki khynnah wow yait ki oo neidaw wa ktah ko ya ka imlang sah lang kamjooh leh ki yung ki sem.
Discussion about this post