U Montri wa pait yaka chnat puræ puthi ha ka jylla, u Lahkmen Rymbui da ong u wa dang artatien wow ye u pynku ya ka tulop kiwa sikai SSA ha ka jylla, neibhah i lut ym duna ko ya ka T. 200 klur.
Hawa kylli, da ong u wa ym pu yoh yutip yei kular wow pdiang ya ki dawa yong kiwa sikai SSA wow pynku tulop, tangwa da ong wa neiliang u State Project Director ka Sarva Shiksha Abhiyan State Education Mission Authority Meghalaya (SEMAM) toh i kamram yong oo wow pait lada man iwa ye u leh næ ym ye, wei wow pynpoi cha ka sorkar kawa hap leh wow bichaar lada em næ ym em poisa.
Kam wow kdaw heini, ka Meghalaya SSA School Association (MSSASA) da pyntip ko wa ka Executive Committee yong ka SEMAM wa yong ka Project Approval Board (PAB) da mynjur ko wow pynku noh ya ka tulop yong ki 12,541 ngut kiwa sikai skur SSA kiwa em ha ka jylla.
Hawa kylli chooh chooh, da ong u wa ka sorkar daw bichaar ko leh yaka bui (Report) kawa daw phah da u Project Director ka SEMAM, wei da klam che u leh wa kamwa man kattæ, ka sorkar ym ye ko wow pynku yaka tulop kiwa sikai, hanla kattæ leh daw yang chwa ya ka Report na u Director.
U Rymbui da ong u leh wa lada pynku chooh chooh ya ka tulop yong kiwa sikai SSA, i pynlut daw man ko sa kamwa T. 200 klur.
U Montri da pyntip u leh wa ka tulop neibynta kiwa sikai SSA da su da ka sorkar pyrdi T. 15,000, katwa kawa tam ya itæ da hap wow pynlut na ka sorkar jylla, deiwa pynrap biang wa kamwa ka man kattæ, dang artatien wow ye u pynku ya ka tulop kiwa sikai SSA.
Kamwa man katni, ka tulop yong kiwa sikai skur SSA Lower Primary ka man ko T. 19,044, katwa kiwa sikai skur SSA Upper Primary man ko T. 20,493 chi bnai.
Ha iwi won i liang, u Lahkmen Rymbui da ong u wa ka sorkar daw hap ko wow bichaar biang yei em ki skur wa duna ki khynnah, deiwa ong leh wa em ki skur wa tang uwi leh ym em khynnah skur wei em ki skur kiwa em du hapoh 10 ngut ki khynnah, tangwa ka sorkar hap ko wow pynneh ya kam kitai ki skur neibhah wa em kiwa jngai bun Kilometer na kawi won ka skur.
Da ong chooh chooh u wa ka sorkar ha u snem 2019 da em ko yei thmu wow pynthymme biang ya ki skur, tangwa neidaw wa wan ka khlam ha u snem wa da dep, ka sorkar da hap ko wow sangeh chwa ya ini i thmu wei daw hap wow bichaar biang.
