U Montri Rangbah ka jylla, u Conrad K Sangma da ong u wa ka sorkar ye ko wow pteiñ yei khang wei dang hap khoom kdoh ko ya i krehkaam ha waroh kawi ka jylla wei ye leh wow rap pynyinsur ha ki kattu katni bynta, tangwa ya ini ka sorkar daw khut yalang biang ko wow pait yei man i long ha ka jylla wa ha waroh ki district wei hadien ini daw ye u chim ya i rai wa khaddooh.
Hawa kylli ynne ka sngi, da ong u wa hanlada sdang hiar i yabi uni u khñiang COVID-19 ha ka jylla, ym mut i wow kheiñstiñ noh wei ka sorkar dang bichaar bniah ko yei man i long waroh khamtam i em ki thaw thiah ha ki thaw sumaar wa kiwi kiwi.
Heiyatoh wa i yarap cha kiwa chong chnong kiwa dooh wa duk kiwa mylla sngi, u Montri Rangbah da ong u wa ka sorkar da yaklam ko yeini man-i-por wow yarap ya ki paidbah tangwa chem chitom ko neibhah wa em chiboon i lut i sep lada hap e ya waroh, kamwa man katni ym du ha ka jylla kawa chem chitom ha i duna poisa tangwa ha waroh kawi ka ri India leh duna ka poisa.
Da ong u leh wa ka sorkar kwah ko wow yarap cha kiwa chong chnong kiwa da chah ktah na i khoom i kdoh, wei hanla duna ka poisa da thooh ko da kiwi tawon ki laad kam wow pynlait poisa cha ki MLA wow yoh ki u e yarap, da elaad ya ki MLA wow pynlut na ka Scheme SRWP.
Choh chooh da ong u wa ka sorkar da pyrchang ko wow yarap ya ki paidbah lyngba ka MHIS wei wow su T. 50,000 cha ki manyung kiwa em wa khlaad na u COVID-19.
U Conrad da ong u leh wa i khoom i kdoh wa katni ymtoh kam ha u snem wa dadep neibhah wa da chah ya ki kreh u lai bait ki kam ha i chna yung, ki kreh 100 sngi wa ki warep khnang wow duna i doohnong ki paidbah.
