U Dr. DD Lapang uwa man kam u Chief Adviser namo uwa e buit yong ka sorkar Meghalaya Democratic Alliance (MDA) da ong u wa i wym ye wow yoh ya u Montri Rangbah na Ri Khasi-Jaiñtia toh wa da boon palat kiwa yahkhmat.
“Nga ym kwah O wow man chiliang lane pait jaitbru, tangwa nadooh i por yong u Captain Williamson Sangma da yahkhmat bait ya ka jylla nadooh wa yakhih Hill State hadooh wow yoh Hill State,” da ong u Dr. DD Lapang, uwa man leh u Montri Rangbah warim ka jylla hawa yaklam wa uwa thoh khubor.
Da ong u wa boon na ki daw wym ye wow sai Montri Rangbah na ka Ri Khasi-Jaiñtia toh neidaw wa da boon palat kiwa yahkhmat wei boon leh kiwa jop ya ki Election, kamtæ da chem chitom won wow jied ya uwa yahkhmat neibhah wym ye u mynjur ya uwi, katwa ha Ri-loom Garo won hanla em boon kiwa jop ya ka Election na kiwon kiwon ki seiñ leh tangwa uwa yahkhmat em bait du uwi wei ym em eh wow jied yow yahkhmat ya ka jylla.
“Ha Ri Khasi-Jaiñtia i em i boon kiwa yahkhmat kiwa da biang da stat wow chimkti yei kaam Montri Rangbah tangwa eh won wow yoh neibhah ha i boon palat ki seiñ saiñ pyrthai wei kiwa boon hi da man chwa ki kiwa yahkhmat,” da ong u Lapang deiwa pynrap wa ini ym toh iwa sih wei em itæ i thrang wei kawa hap wow yakhun.
“Lada em ka yatylli kawi heini ha Ri Khasi-Jaiñtia, daw em iwa jem bha wow yoh ya u Montri Rangbah tangwa kamwa da yoo da rap eh wow yoh yei yatylli, neibhah boon ki seiñ saiñ pyrthai ki burom ki yei yong ki kamtæ neini chakhmat leh kopsar dang hap wow lai bait kamwa man katni,” da ong u Dr. DD Lapang.
