Uwa yahkhmat ka Liang Pyrchah, u Dr. Mukul Sangma da ong u wa ka Meghalaya dang em hi ko hei maa na ki kaam ki seiñ kieñ suloi khamtam nei rukom man ka kaam saiñhima ha Assam wa Bangladesh najrong kiwi de ki kaam wa em ha waroh ka North East.
“Ya ka Meghalaya da pait, da tip ya ka kam ka thaw esikai neibhah nachwa da jooh em ki ktem Training Camp. Kamtæ ym toh wow kheiñstiñ neibhah wym tip yi jia ha ki thaw wa em chapoh bha ka jylla,” da ong u Dr. Mukul hawa yaklam wa kiwa thoh khubor hadien ka yalang ka State Security Commission (SSC) ynne ka sngi.
Hawa kylli kammon sñiaw u yei lai i wan ki dkhot ki seiñ kieñ suloi, da ong u wa em hi i sñiawkhia wa da em i pyrchang da kiwa pyndem na kiwa boon ki seiñ wow ya krehlang biang ki.
“Yoh yutip hi yei lai i wan ki dkhot na kiwi ki seiñ ki wym toh ki dkhot ki seiñ napoh ka jylla,” da ong u Dr. Mukul.
Da ong u leh wa emkaam wow man kiwa khyrngiat deiwa kynmoo wa ye u em kiwa thmu u chim kabu ya ki thaw wa em ha Meghalaya, deiwa pynrap wa emkaam wow sñiawthooh yeini i kaam hapoh ka thaaiñ yow ye u khanglaad.
Hawa klam won chaphang uwa yahkhmat warim ka HNLC, u Cheristerfield Thangkhiew, da ong u wa uni toh uwa da yut na ka seiñ wei uwa da psiah biang chapoh ka imlang sahlang.
Heiyatoh won wa ka yachem ka SSC, da ong u wa kani ka Commission da yachem biang ko hadien u 2018.
Kam u dkhot ka SCC, da ong u wa da ban joor u yei emkaam wow yachem man ka 3 bnai.
Da pyntip u leh wa da rai wow thung ya ki arngut ki dkhot wa laitlooid hadien wa da kut i por yong ki arngut kiwa nachwa.
“Da yooluti wa kani ka Commission daw em lut ko ya waroh ki dkhot hadien wa dep u leh ya ini waroh,” da ong u Dr. Mukul.
