U MDC ka Saphai Sahsniang Constituency, u Rikut Pareiñ hawa wanrah ya ka Motion ha ka sngi pynkut ya ka Dorbar Mang Tangka ka JHADC, da ong u wa da tip hapoh ka jylla Meghalaya da em le tylli ki jaitbru wa man kam ki Indigenous Tribe kiwa tip kam ki Khasi, ki Jaiñtia wa ki Garo kam ki Main Tribe.
Da ong u wa ki Jaiñtia hanla man ki kiwa khian paaid leh tangwa em ki ka riti dustur kawa sakhiat nadooh ka rukom im hadooh ki ktien ki thylliej, ka tem ka put, ka riam ka biat wei kamtæ ter-ter wei da yoh leh ya ka Sixth Schedule yow yada yei hok, i thaw i bhaw wei da yoh leh yei hok wow synchaar ya idæ yow yada leh ya ka mynried yong i deiwa e bor leh ha ka District Council wow chna ki aiñ yow yada ya ka jaitbru.
Da ong u wa lada dooh ya ka dustur riti man ko leh i dooh yei pyrtuid ka jaitbru wei kam ka jaitbru kawa khian paaid ym kwah i wow jia kamwa da jia ha Tripura heiwa ki tre chong da hap ki wow dawa yei hok yong ki pyn ha ka chong yong ki.
Hawa e jubab yeini, u Deputy CEM, u Lasky Rymbai da ong u wa em ki kattu katni ngut ki khon ka Ri-loom Jaiñtia ki wym tip ki wa ki toh ki Pnar næ ki Indigenous Tribe. Wei kam ki Pnar toh ki Matrilienal Society kiwa e jait cha ka bei, wei neiliang ka Executive Committee da chna ko leh ya ka Arts & Culture Department yow pynkhlan ya ka riti dustur wa em ha Ri-loom Jaiñtia.
Da kdaw u ya ki dak thoh Jaiñtia wa da mynjur nadooh u snem 2022 yow pynkhlan yei ktien Jaiñtia wei daw pynpsiah ki leh ha ki skur ka District Council LP School. Neitæ da tipmit leh ya ki jait kur wa em ha Ri-loom Jaiñtia wei da pyndep ya ka 1st Phase.
Da ong u leh wa daw chna ka aiñ yow tipmit ya ki dustur riti heiwa da pyntip cha ki Dolloi yow khana ki kiyi de ki jait chaad, ki dustur riti wa kiwi de tangwa sñiawsih u wa ki Dolloi ym em chimkhia ki yeini.
Da e nongmuna u leh wa da tipmit ya ki labon wa man kam ki dustur heiwa oo leh da deiñ u ka hapoh ka yung dorbar wei da em leh kiwa da thaiñ yow pynemkaam da ki kynthai wa ki chynrang.
Chooh chooh da khana u wa ha u snem 2025-26 da booh leh ka mang poisa deiwa em leh ka Government Grant kawa Rs. 1.78 klur wei da e leh ka dorkhat cha u Tourism Minister ha itu i por, u Paul Lyngdoh neibynta ini tangwa da haap chuki noh u.
Wei hawa lai pynyoo yeini cha ka Tourism Department da ong ki wa hap noh wow phiah yeini neibhah ka chnat Tourism wa ka Arts & Culture Department hapoh ka jylla da em ki jar jiar ka chnat. Tangwa kattæ leh dang pteiñ yeini hapoh ka Planning Department yow phah biang cha ka sorkar jylla.
Hawa chimbynta ha kani ka yatai, u CEM ka JHADC, u Thombor Shiwat uwa man leh kam u Chairman ka Customary Law Committee, da ong u wa boon kaam bha man-u-bnai heiwa da em ki kattu katni ki Elaka ki wym pu em wow e dei thoh chaphang ka riti dustur yong ki yow pynneh pynsah ka wei daw pyn-eh ki yow leh noh ki yeini.
Neibhah kani ka kaam ymtoh du wow chaniah para dkhot EC neidaw man ko kawa maa lada kam ka District Council ym ye ko wow leh neibhah man ko ka burom ka Ri-loom Jaiñtia waroh kawi neibhah em boon ki jaitbru.
Da ong u leh wa kamwa da yoo hapoh ka dorbar mang tangka ka sorkar jylla da em ki MLA kiwa kwah wow pynwiar yei pyrtuid ki Jaiñtia.
Discussion about this post