15 49.0138 8.38624 1 0 4000 1 https://wyrta.com 300 0
Advertisement ad1

Dang im ki Pnar heitieñsar hapoh ki ar chnong ha Moulvibazar
Pynbaam poisa ki heh spah kper slacha yaki bor District : GSIPF

0 Comments

Jowai : Hadien wada mih ka hukum na u Deputy Commissioner, ka Moulvibazar wow mih chnong ki 700 tam ngut ki Pnar wa im haki ar chnong, ka Nahar Aslom waka Nahar Kailin, kiwa em hapoh Srimangal Division yong ka Moulvibazar, Bangladesh.

Ynne ka sngi, ki heh yong ka Greater Sylhet Indigeneous Peoples’ Forum (GSIPF) dalai yachem ki wa u DC ka Moulvibazar, tangwa kat wym em u DC da yachem ki wa u ADC yong ka wow yaklam heiyatoh weini.

“Neiliang u ADC da kular u wow chimkhia yeini hapoh chi sngi ar sngi” da ong u ma P. Suchiang u President ka GSIPF.

Da kynnoh wa em iwa bakla ki wakreh ka bor District u thap yei pyrtuid thaw haka soskular e wai yei thaw hapyrdi ki heh ka sorkar waki heh ka Company slacha, kawa da kam leh yaki thaw rep waki chnong wa im kini ki Pnar.

“Yoosar da pynbaam poisa ki heh ka kper Slacha ya kiwa kreh ka District Administration neibhah khlem lai li pait li sylli da pynpsiah heh ki ya kini ki pyrtuid ki ar chnong hapoh ka Soskular (Agreement) wei da pynmih yaka hukum khlem da pyntip chwa” da ong u ma Suchiang.

Neiliang kani ka Forum leh da ong ko wa lada ym chimkhia ki bor District heiyatoh wow pyndam ya kani ka hukum tæ deiwym yohsa daw lai ki chaka yung bichaar heiyatoh weini wei dadep yaklam ki leh wa kattu katni ngut ki muktiar wa stat hapoh ka ri Bangladesh.

Kiwa chong chnong da pyntip ki leh wa hadien wa mih ki khubor wa em kam kani ka hukum wow beh chnong yaki, ki tre chnong wa puræ wa kiwa kreh cha kiwi ki bynta ka ri Bangladesh da liwan ki cha chnong neibor wa tieñ yaboi jia sakhiat i chah beh ki.

U ma Suchiang da pyntip u leh wa kini ki chnong man ki ki chnong warim bha wei ymye ki bor District u pynmih heh kam kani ka hukum kawa bakla.

Neiliang u Wyrta daw boodien chooh chooh u lada em kawon kawon ka khubor wa mih heiyatoh weini waroh.

Advertisement ad1

0 Comments

Leave a Reply