U Montri ki kaam pohyung ka jylla, u Lahkmen Rymbui da pyntip u ynne ka sngi wa ka bui (Report) lyngba ka Magisterial Enquiry wa takit yeiwa jia ha ka krem tih mooyong wa em ha Krem U-Le, Umpleng East Jaiñtia Hills toh kawa ympu em yoh.
“Ka Home (Political) Department toh kawa da leh ya ka takit wei ym pu em yoh yutip wa da e ki ya ka Report,” pyntip u Montri.
Da pyntikna u leh wa ynne ka sngi Thohdieñ da yoh wow sai ya iwi i metyap uwa na Karimganj District ka Assam wei da leh yeiwa emkaam yow phah yei metyap cha i chnong u.
Na ki le tylli ki metyap wa da ye u sai, dang ye wow tipmit du ya uwi donhi wei ye leh wow tipmit sa ya uwi heiwa da em kiwa hayung kiwa da poi wow kam yei metyap.
Hawa kylli yei lutsan, u Montri da ong u wa iwa hakhmat dooh ya ka sorkar toh wow sai chwa ya kiwa sahkut wei lada toh kiwa da khlaad, yow sai yei metyap wei ym pu tip katwon i lutsan neibhah ym pu em pyntip u Deputy Commissioner.
Hawa kylli lada emkaam bru chooh na ka sorkar pyrdi wow yaleh pyrchah yei tih mooyong pyrchah ya ka aiñ neidaw wa duna bru ki pulit khamtam wa katni em ka khlam, u Montri da pyntip u wa ini ym toh iwa emkaam wow leh neibhah ki kaam wa yatoh wa ka aiñ toh i kaam yong ka sorkar jylla wei daw leh ko ya ini.
“I man i kiwa da biang i pynkhreh hanla em i duna heiwa ha kini ki chi snem chiteiñ da em ki bru wa chim kabu yeini wa boonkaam ki pulit wa ka khlam,” da ong chooh chooh u.
Kam wow pynkynmoo wa ha uni u snem ha u Duyatra (Jan), ha East Jaiñtia Hills da yap 6 ngut kiwa tih mooyong kiwa na Assam hadien wa tkut ka Crane wei ha u Kmaichonglad (Dec) 2018, kamwa 17 ngut kiwa tih mooyong da dooh yei mynsien ki ha Ksan, East Jaiñtia Hills.
