Shillong: Ha Shillong West Constituency ha chwa wow poi ka Election MLA 2018 da man ko kawa chong syir mynsien ki paidbah hadooh wa ka Block Committee ka Congress da paan yarap ko na ka tnat pohyung yow pynbiang pulit ki yow lait na iwon iwon wa sñiawsih u jia.
“Da paan yarap i hapoh ka Shillong West khamtam heipor miet nadooh 10 pm hadooh 4 am neidaw wym em kwah mih i sih heipor wa yalap Election” da ong u Mahendro Rapsang, President ka Shillong West Block Congress Committee (SWBCC) ynne ka sngi.
U Superintendent of Police (City) Vivek Syiem da kular u leh ya ini hadien wa yachem ka SWBCC ya oo.
Kani ka kaam da heh yaaw ko hadien wa pynbaad u MLA ka Shillong West u Paul Lyngdoh wa emkti u Rapsang deiwa su poisa u ya ki bru wow pakhot Petrol Bomb ya i yung u (Paul).
U Paul uwa man leh u Working President ka UDP da dep booh FIR u hei yatoh wa ini ha ki pulit ka Lumdiengjri ynnin ka sngi.
Neiliang u Rapsang won da kyntait u yeini wa pynbaad u Paul wa man khlem sabut wei khlem yurim. Da ong u leh wa dang thooh buit u na ki muktiar wa kammon u lai u cha khmat hei yatoh wa pynbaad u Paul ya oo.
“Nga u yeiñ yaleh Election O yow wanrah yei kylla ha ka ki kaam puræ puthi, i chait i khiah wei wow pyndooh ya i dooh i duk ymtoh wow phah ya kiwa kyrchaan ya nga u leh ki ya ki kaam pyrchah-aiñ wei kiwa kyrchaan ya nga kyrchaan ki neidaw wa maya ki ya nga ymtoh wa tieñ ki nga” da ong u Rapsang.
Da ong u leh wa kiwa kyrchaan yong oo da em kiwa chah pakhot Petrol Bomb ki yung yong ki wei ha kini ki sngi wa da dep da em wa pynsih ya ki CCTV Camera wa em ha ka Block Office ka Congress ha Mawprem.
Da pyntip leh wa da dep ki u e ya ki Video cha ki pulit wa yoh na ki CCTV Camera ya ki bru wa emkti wow pynsih ki wei dang yang ya ki pulit wow pynman ya ka takit yow chem yei hok.
Discussion about this post