Khliehriat: Ki seiñbhalang na ri-loom Khasi wa Jaiñtia wa kynthup ya ka JYF, JSU, FKJGP, MPUF, HSU, AJSU, HNYF, RJYF, JSM, PAJP, JNC, KSU, HANM, NWYF ka AJHSWO wa kiwi kiwi ha ka 29 tarik uni u bnai da pynman ki ya ka lai kjat wa i rah lama rong yong deilang wa ki kot-rben wa thoh ya ki kyntien wow beiñ yeiwa chah tynyap u (T) Poipynun Majaw uwa man kam u President ka Jaiñtia Youth Federation (JYF).
Kani ka lai kjat da sdang nadooh na Khliehriat Police Station hadooh ha yungkrehkaam u DC ka East Jaiñtia Hills, Khliehriat.
Ha u DC da e leh ya ka dorkhat wow dawa wow pyndep smat ya ka takit heiyatoh wa i jia ya u Poipynhun Majaw wei wow kem ya kiwa emkti.
Neiliang u DC u MS Lhuid da mynjur u wow chim khia ya kani ka kaam wei da kyntu u leh ya ki seiñbhalang wa kiwon kiwon kiwa em yutip yeiwa jia wow wan ki cha khmat ka wow yarap ya ka takit ki pulit wei hadooh ki heh pulit ka jylla leh da chimkhia ki yeini iwa jia.
Hadien ini da pynman won saka yalang paidbah ha pchem ka Khliehriat West Community Hall heiwa da yoh i klam na kiwa boon kiwa yahkhmat ki seiñbhalang kam u Lawyerson War u President ka JSU Central Body, Ricky Shylla u General Secretary ka FKJGP-Jaiñtia Hills, u Rikut Parein u President warim ka JSU, u Nehemayah Tyngkan kam u bru paidbah wa kiwi kiwi.
Hadien wa kut ka yalang da mynjur wow e por ya u DC ka EJH kamwa da kyrpaad u ya ki seiñbhalang wow yaichah ki wow pyndep ya ka takit neiliang ki pulit katkam i yaklam heipor wa yachem ki seiñbhalang wa oo.
Ha kani ka sngi ya ini waroh da pyllai da ka Co-ordination Committee for Justice (CCJ) kawa man President u Brightstar Chyrmang wa u Secretary u RK Ram Rymbai.
Discussion about this post