Shillong: U Secretary ka Hima Nongspung, u Michael Warjri da kyntait u yei chah pynbaad wa leh u samen wow e No Objection Certificate (NOC) yow chna ya ka sarok na ka Scheme sorkar pyrdi ka Pradhan Mantri Gram Sadak Yojana (PMGSY) cha u Contractor na Assam wow pynyabi ya ka West Guwahati, Assam waka New Balakhawa, Ri-Bhoi District.
“I e NOC ha ka 25-07-16 toh hadien wa pynbor yong ki Rangbah Shnong wa kiwa chong chnong, i da booh kyndon i wa manda dep chna ya ka sarok ym ye wow kamtre, u man bait ko ka thaw ka Hima Nongspung hapoh i pait u Syiem,” da ong u Michael.
Da pyntip u wa neiliang ka Hima da thoh ko leh cha u MLA ka West Assam, u Ramendra Narayan Kalita wa ka soskular hapyrdi ka Hima wa u MLA da pyndam noh ha ka 26-07-16 neidaw wa ym yoh bor naka sorkar Meghalaya.
U Warjri da pyntip u wa ka kynrum kynram ha New Balakhawa da mih hadien wa ujor u cha ka Meghalaya High Court pyrchah ya ka sorkar Assam neidaw wa pteiñ wow chna ya u sarok khlem da yoh bor naka sorkar Meghalaya kamwa da yasoi ha ka soskular hapyrdi ka Hima wa ka sorkar Assam.
“Ha u Wisu (March) uni u snem, ki Rangbah Shnong yong 6 tylli ki chnong da phah pyndam noh ki ya nga yaka ujor ha High Court wei da maham ki wow tympra leh ya i yung i sem O.” da ong u.
U Warjri da pyntip u leh wa hachwa wow chna ya u surok da booh u ki kyndon leh ya ka Assam wa ka toh u yoh bor ko chwa naka sorkar Meghalaya katkam ka soskular wa da yasoi wa u Prestone Tynsong ha ka 11-11-09 wei lym kamtæ ka Hima ym chah ko wow yasoi kot heiyatoh wa u tai u sarok.
“Ha ka 21-03-18 nga da phah O yei thoh cha u Prestone wow jubab la ka sorkar ka e bor ko næ ym em tangwa ym em jubab yeini,” da ong u Michael.
U Warjri da pyntip u wa ka kyndon wa nyngkong wa da booh ha katai ka soskular wa da mynjur leh da ka sorkar Assam toh wa ka Assam ym ye kow wow kamtre ya i thaw hadien wa da dep chna ya ka sarok. Kawa ar toh wa ka Assam ym ye ko wow kamtre ya katai ka sarok wow pynyabi na Patkang cha Baklapara chadooh Lyngkhung, na Mawdaki, Baklapara cha Balakhawa, na Aguri, Bernongsai, Hawla, Ranibari, Mataikhar chadooh ka MV School, Ranibari cha Mataikhar wa na Bilpara, New Balakhawa cha Ranibari wei chadooh Aguinijira. Ka kyndon wa le toh wa ka Hima Nongspung hadien wa da dep wow chna ya katai ka surok da ka Assam, u mantre hi ko kamwa jooh leh da ka Hima nadooh ki por wa da lai.
Da pyntip u leh wa haka 26-06-18 ka Hima da yasoi lang u Syiem Patrick Syiemiong, wa oo kam u Secretary wa u Joint Secretary ki da phah ki ya ka Assam wow sangeh noh ya i kreh yaka sarok neidaw wym yohbor na ka sorkar Meghalaya.
“Sa iwa i thoh wa da phah i leh cha u Contractor wa ym ye u wow psiah khlem da yoh ya ka Trading Licence na ka KHADC, wei da e Copy i leh cha ka Council leh, tangwa ym em leh ko iyi iyi leh,” da ong u.
Hajrong kani ka kynrum kynram neiliang ka KHADC ynnin ka sngi da khot hajir ko ya u Michael Warjri heiwa da rah u leh wow pynsakhiat ya ka yurim deilang wa ki kot ki sla.
U Executive Member ka KHADC wa pait yaka ka Land, u Titosstarwell Chyne da ong u waka Council ym pu ye ko wow e kawon kawon ka rai, wei daw khut bichaar biang ko ya waroh arliang, kitæ ya u Syiem ka Hima Nongspung wa u Secretary.
Da pyntip leh wa u Michael da pynche u hakhmat ka Council wa kayi kawa da leh toh kawa da tip lang u Syiem.
Also Read: Kyntait u Syiem ka Hima Nongspung wa e NOC u wow chna sarok
Discussion about this post