Ka Jaiñtia National Council JNC ha ka kyrwoh na u President wahehdooh ka seiñ, u Sambormi Lyngdoh da pynsñiaw ko yei wym sñiaw yahaap yei klam u Montri Rangbah, u Conrad K Sangma yei wym em thap lang yei ktien kiwa na Jaiñtia haka rwai State Anthem toh katkam ki kyndon ka aiñ.
U Sambormi da ong u wa i dawa yong i wow pynpsiah yei ktien ki Jaiñtia haka Anthem ymtoh du neibynta i ktien tangwa nyngkong heiyatoh waka riti dustur ka Ri Jaiñtia kawa em i yong ka hi nadooh ki spah spah snem wei ka dustur riti yong ki leh man ko kawa mahajon kawa phær bha tangwa ka sorkar da leh mylliñ ko.
“I dawa yong i wow kynthup lang yaka ktien na Ri-loom Jaiñtia toh wow pynchong yurim leh hajrong ki le jaitbru namo ki Major Tribes kitæ ki Khasi, Jaiñtia wa Garo. Lada ka English yoh ko wow psiah kam katæ ka Official Language tæ ileh wa yaka Jaiñtia kawa da em ka parom chwa wa u pharæng wan yooh kjat u heini, ka Jaiñtia da em chwa ko chirup wa ki niam ki rukom, ki riti ki dustur kiwa da hikai ya i nadooh ki warim wajah.
Ka Jaiñtia kawa da em leh ya u khlawait ka ri u Kiang Nangbah uwa da yaleh neibynta i laitlooid ka ri kattæ leh ka sorkar dang mut ko u mylliñ yaka Ri Jaiñtia. Ka Constitution ka ri India leh haka Article 29 da klam che ko wa kawon kawon ka Tribe em ko ka hok wow yada wow pynneh pynsah yei ktien u thyllieh waka dustur riti yong ki, kamtæ kammon won u Montri Rangbah da ong u waroh da leh katkam ka aiñ?
Ka aiñ wa kam kayi katæ kawa mut wot wow pyndooh jait yei hok ka Ri Jaiñtia kawa man leh kawi na ki ‘Major Tribes’ yong ka jylla, hawa pait yeini yoosar wot yaka Reservation Policy leh daw pyndooh ka sorkar yei naam ka Jaiñtia tangwa lada man katwa man leh, ka seiñ ym e laad ko wei ym pdiang ko ya kam ini i thmu.
ka seiñ da pynsñiaw ko leh wa hawa da em leh hei thoh wa ka Meghalaya toh kawa em le tylli ki jaitbru ri-loom, ileh hap pyndooh bhah ya kawi? Ka sorkar hap pynche hap jubab ko yeini.
Ka seiñ kyntu ko leh ya ki 7 ngut ki MLA wa ki 30 ngut ki MDC wym toh wow suki hi-eh ki, toh u klam ki wa la kammon kammon leh ym hoi u wiar ka Jaiñtia neibhah kani daw pynsñiaw sih ko ya ki nong Jaiñtia. Le ngut ki Montri da toh u biang bha wow leh ki iye re iyi hajrong ini.
Ka seiñ pyrchah joor ko leh yei ktien yong kiwi heithaw em chwa i yong i, ka seiñ kwah ko ya u Montri ka chnat Arts & Culture wa toh u leh u yeiwa emkaam wow e lang yei ktien ya waroh ki le jaitbru bar yow pynksan yei ktien kiwi na baar.
Khaddooh neiliang u Sambormi da ong u wa yaka Meghalaya State Anthem hi ym man ko kawa pura khlem ka Jaiñtia neibhah wot yaka Meghalaya leh da pynwandur da ki le jaitbru kitæ ki Khasi, Jaiñtia wa Garo wei ileh haka Anthem won ym em ka Jaiñtia?
Ki nong Jaiñtia leh ym sñiaw ye ki wow pdiang yei leh mylliñ ka sorkar yaka Ri-loom Jaiñtia, pynkut u President ka seiñ.
Discussion about this post