Dang pteiñ ka sorkar wow pyrchang pynlait ya ki 15 ngut na krem mooyong ha Ksan

Shillong: I chah kset um kiwa tih mooyong ha Ksan, East Jaiñtia Hills nadooh ka 13 tarik uni u bnai, da kynjoh i palat chitayaw wei ympu ye hi u sai ya ki bru kiwa da em 15 ngut hapoh ka krem mooyong.

U Symbood Montri Rangbah ka jylla, u Prestone Tynsong hawa yaklam wa kiwa pathai khubor ynnin ka sngi da ong u wa ka sorkar ka dang pteiñ ko wow kreh yow sai ya ki bru kiwa da sahkut ha katai ka krem mooyong, da pyntip u leh wa kiwa ngam um (Diver) ka National Disaster Relief Force (NDRF) chem chitom ki wow kreh hadien wa hiar won sa u slap.

“Ka thaw man sakhiat ko kawa eh bha wow pynsngat ya ka um, ha kini ki sngi wa slap da yoh yutip wa ka um dang rap ku ko. Katkam wa pyntip ki bru wa tip wa i rukom man katai ka krem, chapoh dang em sa boon tylli ki krem wei katwa dang taan ya ka um kattæ dang mih neidaw wa mih ko ym du na chi thaw donhi,” da ong u Prestone.

U montri da pyntip u leh wa da yoh yutip u wa u loom wa tih mooyong man u uwa heh kamwa 3 Sq. Km, iwa mut wa i tih ya u tai u loom toh iwa da boon, wei da pynsñiaw u yei kyrmen wa daw ye hi u pynsngat ya ka um khnang wow yoh u sai noh ya ki bru kiwa chah kset neidaw wa katni toh i por tlang.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U Prestone da ong u leh wa ya ka um wa sai na kani ka krem ym yohsa haap pynlait cha ka wah hanlada tip wa man ko kawa khlan Acid neidaw wa emkaam wow sai chwa ya kini ki bru.

Hei yatoh wa i su bai lutsan cha kiwa ha yung yong ki bru wa ngat ha kani ka apot, neiliang u Prestone da ong u wa hadooh katni ka sorkar ym pu em chim ko ya ka rai neibhah ym pu yoh yukheiñ wa tikna ya ki bru wa kiwa chah kset wei katwon ngut toh ki tre jylla.

Ha iwi tawon, hadooh katni kiwa ngam um ka NDRF kiwa em ha katai ka thaw ym pu chem luti ki kammon wow sai ya ki 15 ngut kiwa tih mooyong neidaw wa dang joor i liat ka um.

U Assistant Commandant ka 1st NDRF Battalion, u SK Singh da pyntip u wa katni ki bru wa tip bha chaphang kani ka kaam da poi ki cha East Jaiñtia Hills kiwa daw thooh bniah yei rukom lai kani ka um.

“Ka um hadooh katni (ynnin) da hiar ko kamwa 6 inchi wei ini leh toh neidaw wa ka um naka wah wa tooid cha kani ka krem da duna ko” da ong u Singh.

Also Read: Da suba wa em sa uwi wa chah kset ha krem mooyong chirup wa ki 14 ngut ha Ksan