Shillong: Ka sorkar jylla ym pu ye ko wow chim yaka rai wow wai yaki ar tylli ki yaw kiwa heh ha nongbah Shillong, kitæ ka Iewduh waka yaw ha Khyndailad neibhah wa hadooh kattæ dang thooh laad wei dang yang leh yei pynche wa bniah na kitu kiwa embynta wa kynthup na ka Deputy Commissioner, ka SP, u Syiem ka Hima Mylliem wa kamjooh na u CEM ka KHADC.
Hawa klam ynne ka sngi, u Symbood Myntri Rangbah, u Prestone Tynsong da ong u wa ka sorkar dang yang ko yei batai wa bniah kammon wow wai noh ya kini ki ar tylli ki yaw khnang wow ye u pynlai chakhmat yaka khayi pateiñ ha ka jylla wei kamjooh leh wow e laad ya kitu kiwa khayi kiwa em ya ki dukan ha kini ki yaw.
Hawa kylli yei sñiawkhia yong kiwa boon lada wai biang ya kitai ki yaw, da ong wa ka jylla emkaam ko ya ka khayi pateiñ, wei ki paidbah katni toh u tip ki wa ka yakhun man ko samen samen wei hap wow syndong ya i-dæ deiwa bood thij yaki kyndon wa da phah.
U Montri da ong u wa kattæ da palat 2 bnai wa ka jylla da yakhun ko ya kani ka kaam pyrchah yaka khlam COVID-19, tangwa hadooh kattæ ym pu em wa ye wow tip mynnu kani ka khlam u kut ko, lane mynnu uni u khñiang Coronavirus u yap u, deiwa ong chooh chooh wa ha kawi ka sngi ya kini ki jait krehkaam daw hap wai hi, wei neiliang ka sorkar daw hap thooh ko yaki yaki laad neibynta wow sdang biang yaki kaam ha ka khayi pateiñ khnang wa ym chah ktah kiwi de ki bynta yong kiwa khayi ka jylla kiwa da dooh nong nei khang chnong.
Discussion about this post