Ka JSU da pynsñiaw ko yei wym mynjur yeiwa ong u Symbood Montri Rangbah, u Sniawbhalang Dhar heiyatoh wa i wanrah luti rel cha Ri-loom Jaiñtia neibhah du ki kattu katni ki heh spah kiwa kwah ya ka rel.
Ka JSU da ong ko leh iyi mut wow wanrah luti rel kat wym pu em Inner Line Permit hapoh ka jylla yong i.
“Ka ILP toh kawa kyrpang yow khanglaad yei psiah laitlan kiwa na baar chapoh ka jylla yong i, yow yada yei hok waka dustur riti ki tre chnong. I sñiawkhia yong i toh wa lada khlem em ki laad yada kam ka ILP, i wan ki bru deiwa em ka luti rel daw ktah ko ya ka imlang sahlang kamjooh ya ka khayi pateiñ yong kiwa chong chnong ka Ri-Loom Jaiñtia,” da ong ka seiñ.
Sa iwi i daw wa da e ka seiñ toh wa hawa pait yei dor ki mar hapoh ka jylla Assam kawa dem chwa ya ka luti rel, da chem toh kiwa sy’at hawa nujor wa ki mar ha Meghalaya wei i dor khyndaw-bilat iwa da pynmih ha Meghalaya won man i iwa sy’at bar ya iwa dai ha Assam wei ini pynyoo i wa i kwah wow wanrah ya ka luti rel toh yow pynsuk yei kit khyndaw-bilat yow myntoi du ki kattu katni ki heh spah ymtoh neibynta ki paidbah wa boon ka Meghalaya.
Kamtæ ka seiñ da ong ko wa ini pynyoo i wa i wanrah luti rel ymtoh ware yow pynhiar yei dor ki mar tangwa yow wai laad yow psiah ki bru kiwa na kiwi ki thaw wei ini daw ktah ko ha waroh ki liang hadooh ya ka bei rym-aw.
Ka seiñ da ong ko wa emkaam wow yaklam hajrong ini waroh yow ye u poi cha i ya mynjur lang khamtam ya ki kaam wa ktah wei sñiawkhia kiwa chong chnong yow yoh yei roi i paar i da i wym ktah ya i.
Discussion about this post