Ka sorkar jylla hadien wa da yoh ko ya bui (Report) wa thooh bniah da ka skurbah North Eastern Hills University (NEHU) hajrong i pynbaad wa em i ktah wa joor na ka ‘Radiation’ yong u Uranium ha Nongbah Jynrin wa Wahkaji, South West Khasi Hills District, katni dang yang ko sa ya ka Report na ka IIT, Assam.
U Prestone Tynsong uwa man leh u Symbood Montri Rangbah ka jylla, da pyntip u wa katni ka IIT Assam dang em ko hapyrdi ka Exam wei ka sorkar dang yang ko yaka Report manda dep ki yei thooh bniah.
Da pyntip u wa katkam i thooh bniah da ki 6 ngut ki bru chemphang ka NEHU, da chem wa ha ki top pynlang tngit Uranium ka ‘Radiation’ ym ktah palat ko wei lait leh nei maa, tangwa da chem wa kamwa 100 phut na i thaw wa em ka wah Phud Syngkai, ka ‘Radiation’ rap joor ko, wei ya ini dang emkaam wow thooh bniah chooh chooh.
Kam wow kdaw heini wa ka sorkar MDA hadien wa da mih i pynbaad wa em i joor ka ‘Radiation’ ha ka thaaiñ wa em u Uranium, da chim ko ya ka rai ha ka 16 tarik u Naichiphaw, 2020 wow thung da ka takit yow thooh bniah deiwa lai cha Nongbah Jynrin yow paitbniah yei piah ki top pynlang tngit wa i kam wa joor ka ‘Radiation’ ha katai ka thaaiñ.