Dang yang u yoh bor na ka ECI chwa wow ye u wai ya ka Online Application ya kiwa yaleh kreh pulit

U Symbood Montri Rangbah ka jylla wa pait leh ya ka Kaam Pohyung, u Prestone Tynsong da ong u wa u Adelbert Nongrum ym em puræ bha u ya ka Office Memorandum (OM) kawa da pynmih ha ka 3 tarik Thohlakhmi (Feb) yong u snem 2022, hawa yatoh wa i rta thung kreh.

Kam wow kdaw wa u Adelbert Nongrum uwa man u MLA ka VPP na North Shillong da pynbaad u wa i rukom khut thap kreh pulit da ka Central Recruitment Board man ko pyrchah yaka aiñ wei kawa khlem lai katkam ka Office Memorandum yong u snem 2022.

Hawa klam ynne ka sngi, u Prestone da ong u wa ka OM da batai che ko ha waroh ki kaam sorkar da pynyinsur yei rta cha ka 32+5 snem, iwa mut hadooh 37 snem i rta. Tangwa u Adelbert ym em puræ won u yeiwa da kdaw haka OM, kawa ong lait noh ya ki kattu katni tylli ki chnat wa kynthup yaka Home Police, Excise Registration Taxation & Stamps, Home Guard & Civil Defence waka chnat Forest and Environment neidaw wa emkaam ya ki bru kiwa khlan i doh i pran wa khlanbor.

Da ong u wa katni i kaam pulit ka sorkar da rai ko wow pynbait thymme yei rta thap kreh heiwa heiyatoh wa i kaam Sub Inspector (SI) ka Cabinet da mynjur ko wow e laad hadooh 27+5 snem i pynyinsur iwa mut hadooh 32 snem neibynta ki Schedule Tribe.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Neibynta ki Constable, da ong u wa da booh nadooh 18 snem itæ hadooh 21+5 snem i pynyinsur, iwa mut la e laad hadooh 26 snem ka rta, wei ini i rai toh neidaw wa i kaam toh iwa eh wei emkaam leh wow pyndep yei chah hikai namo ka Physical Training. Neibynta i kaam Followers da ong u wa da chim nadooh 18 snem hadooh 27+5 snem, wei ini i kaam leh toh hadooh 32 snem.

U Prestone da ong u wa ini i kaam toh iwa da leh khyllah du ha kani ka jylla, wei da kyntu u ya ki khynroo wym toh u sñiawthooh bakla ki yei klam u Adelbert, wei toh u thap ki yei kaam wa lait katkam wa da pynbna namo wa da pynmih Advertisement.

U Montri da ong u wa ka sorkar dang yang ko yei jubab na ka Election Commission wow e bor yow wai noh ya ka Online Application, kawa da toh u sdang nadooh ka 8 tarik uni u bnai tangwa ka ECI ym pu e ko ya iwon iwon i jubab.