U Monri Rangbah ka jylla, u Conrad Kongal Sangma da ong u wa ka sorkar jylla da pdiang ko ya i rai ka Hynniewtrep National Liberation Council (HNLC) wow yaklam yasuk heiwa da ong u wa ka sorkar da sdang bichaar ko ya ki ksiang (Interlocutor).
Da ong u wa ka sorkar katni emkaam ko ya ka chithi na ka seiñ hajrong ini i thmu yong ka, wei da ong u wa katwa dang yang ya ka chithi ka sorkar leh u bichaar ko ya ki ksiang hajrong ini i kaam.
U Conrad da ong u wa ka sorkar hadien wa yoh ko ya ka chithi na ka HNLC, daw pyntip ko cha ka sorkar India wei hadien ini daw ye wow leh noh yeiwa emkaam.
Kam wow kdaw heini, ynnin ka sngi lyngba ka khubor na u Publicity wa u General Secretary ka seiñ, u Sainkupar Nongtraw da pynsñiaw wa man kiwa smat wow wan noh cha ka miej yaklam ka sorkar jylla wa ka sorkar India khlem booh ya kawon kawon ka kyndon.
Hawa kylli, u Conrad da ong u wa kat wympu yoh ya kani ka chithi na ka HNLC wei kat wympu sdang i yaklam, ka sorkar daw emkaam wow man ko kawa syndong wow yada na kiwon kiwon ki kaam pyrchah aiñ.
