Ka sorkar Meghalaya dang yang ko yei jubab na ka Education Ministry ka sorkar pyrdi yow tip wa lada daw pynlait ya ka jylla na ka Common University Entrance Test (CUET).
U Montri Rangbah ka jylla, u Conrad Sangma ha kani ka tayaw wa dep dadep thoh u wei da lai yachem u leh wa ki Montri ka sorkar pyrdi wei katni dang yei jubab, katkam wa pyntip u Rakkam A Sangma, Montri ka chnat puræ puthi ka jylla.
Kam wow pynykynmoo wa ha ka 7 tarik uni u bnai, u Conrad da thoh u cha u Education Minister ka ri, u Dharmendra Pradhan yow paan pynlait biang ya ka jylla na ka CUET deiwa e daw wa dang dep pynman ya ka Election MLA wei ym pu biang ka Internet ya ki khynnah wow pyndep ki yeiwa emkaam u leh yow thap pyrtuid wei heijooh i por wow paan por wow leh yeini.
Da e daw leh wa neidaw wa em ka Election da hap wow pynslem ya ki tarik wa pynman ya ka Board Exam wei da hap ki wow pynkhreh Exam wei wow pyndep yei thap pyrtuid ya ka CUET.
Kam wow pynkynmoo wa ka jylla ini wa dep da pynbna ko ya ka State University kawa dang yang wow yoh yei mynjur na u Lat ka jylla wei deiwa yoh ya ka State University daw lait kiwa lai puræ Under Graduate wow yaleh ya ka CUET neibhah ka State University ym emyatoh ko wa ki Central University.
Kam wow pynkynmoo wa ynnin u snem, ka sorkar pyrdi lyngba u Montri wa pait yei puræ puthi da pynlait ko ya ka jylla nei pynman ya ka CUET neidaw wym biang ki thaw pynman Exam wa kiwi de ki daw tangwa da ong wa ini toh iwa pynlait du chisein donhi.
