Shillong: U Deputy Chief Executive Member (Dy. CEM) ka KHADC u Pyniaid Sing Syiem da pyntip u hapoh ka yung dorbar wa ka Council dang yoh pdiang ko du T.34 klur na ka sorkar na ka bhah kawa toh u yoh T. 52 klur tam uni u snem.
U Pyniaid da ong u yeini hawa jubab yeiwa kylli u MDC ka Mawphlang-Diengiei u Lamphrang Blah ha yung dorbar ynne ka sngi.
U Pyniaid da ong u wa ka sorkar jylla da pynlait ko ya kani ka poisa yong u snem 2018-19, tangwa neidaw wan noh ka election MP, da haap pynsangeh noh neidaw wa dang krehkaam ka aiñ election.
Ha iwi i liang, u Executive Member wa pait ya ka yaaw, u Jambor War da pyntip u hapoh ka yung dorbar wa ka Council ymye ko wow booh dor ya ki mar, tangwa da ong u wa ka Executive Committee daaw chimkhia ko yei eh i khoo wa achem kiwa rep.
Ya ini da kylli da u MDC ka Malki-Laitumkhrah u Faintin Jospeh Lakadong, uwa kwah tip iyi wa da leh ka Council wow yarap ya kiwa rep ha Iewduh wei ha kiwi ki yaaw.
U CEM, u Teinwel Dkhar uwa da jubab lang yeini, da ong u wa da em nachwa ka rai wa ya ki mar rep kiwa khia hapoh 50 kilo, ymtoh wow ah kilo ha Iewduh wei neiliang ka Council daw booddien ko yeini.
Ha iwi won iwa kylli u MDC ka Mawkyrwat u Carness Sohshang hajrong ka Bill, Khasi Hills Autonomous District (Constitution of Subordinate Council of Traditional Chiefs and Headmen) Rules 2018, u Pyniaid da ong u wa kani ka Bill dang sahteiñ ko ha ka miej u Lat ka jylla wow yoh yei mynjur.
Da ong u wa i thmu yong kani ka Bill toh wow wanrah ya i man iwi kiwa synchaar kiwa haap hapoh u pood u ang ka KHADC.
Discussion about this post