Ynnin i miet u kyrtong ka TMC na Jowai Constituency, u Andrew Shullai da khut pynman u ya ka yalang Election ha Mihmynydu, Lumpyrtuh heiwa da sakhi wa dap kani ka madan chroit da ki paidbah.
Ha ka yalang, u Andrew da kyrpaad u ya ki paidbah wow kyrchaan ya oo ha kani ka kynti khnang wow ye ki wow bichaar ya ki kaam yong oo wa kiwi ki MLA.
Heijooh i por da ong u wa ham e laad ya kiwi wow wan kamai (Business) hi-eh ha kani ka Constituency wa maya yong i.
Chooh chooh da ong u wa ham e laad wow jop da ka spah ya i hok yong ki.
Kiwi kiwa da klam ha kani ka yalang toh u MDC ka Jowai North uwa da mih na ka NPP neibhah wym hun u wow chah pynlai ha u Sniawbhalang Dhar wei ym em kwah u wow man u MDC u wow leh katwa phah ki.
Da ong u wa da yaleh u ya ka Election MDC toh neibynta ki paidbah wei ymtoh neibynta yong ki.
