Ynnin ka sngi da dap smam ka madan Barato dei wan tooid kiwa kyrchaan yong u Nujorki Sungoh kam u kyrtong yong ka Party UDP naka 4-Mowkaiaw Constituency ha ka yalang wa pynlai da u Experience Timung, Waheh Dong ka Barato A uwa jooh kyrchaan ya ka NPP uwa da psiah noh u cha ka UDP neidaw wa da yoo u ya ki kaam yong u Nujorki.
Chwa u sdang ka yalang da yoh i duwai na u Henry Ksoo.
Neiliang u R. Timung uwa na ka chnong Barato da ong u wa oo kam uwa kyrchaan ya u kyrtong ka NPP ha ka Election 2018, oo tip bha u yei rukom krehkaam ka NPP neibhah hawa pynman yalang ki, ki toh kiwa sñiawsuk bha u wanrah wow pynboon paaid na baar Constituency. Neibhah waroh da bna wa ka yalang u Habahun wa man ha kini ki sngi wa da dep ha Sahsniang wa ha Barato da boon wa wan da ki stait suda na baar Constituency yong u Comingone Ymbon wa na Constituency u Sniawbhalang Dhar neibhah markhmat yachem u wa kini ki bru wa wan tooid ki. Tangwa yoosuk hawa kylli da ki tre dukan-ja ya ki heipor wan baam ja ki wa neiwon wan ki, dei mynsien wa lui lui kini paidbah khana hok ki ong ki na Shangpung, na Nongjngi, na Lapangap, na Wahiajer, na Mynso wa na kiwi kiwi ki chnong. Wei yoosuk leh ha katu ki sngi ha ka yalang u Habahun ha Sahsniang yoosuk bha yei tooid ki cha ka yalang deiwa tem i sur u Habahun tangwa manda i por miet won tem ki dei sur Coming, tem ki dei sur u Sniawbhalang.
U Timung da ong u wa ini toh i yahbakla, wow pynheh laær donhi ha kani ka thaw yong i. Tangwa ki paidbah wym em khih mynsien ki neibhah da tip che ki paidbah ya kani khubor. Lada pait phi ha ka Election 2018, u kyrtong ka NPP, G. Sten i jooh hi i rukom krehkaam ki lada yoo ya ki bru wa wan cha ka yalang, ym em thaw de u yaleh wa ki. Wei manda thap Vote, wiar lut ki stait.
Kamtæ da ong u wa ka Party UDP, kiwa kyrchaan yong u Nujorki chynna sakhiat wei maya ki ya oo wei yoo sakhiat wan man ki ki bru kiwa em ka yurim wa skem sakhiat i mynsien. “Paidbah ham chah yahbakla ham chah pynbiej. Ha ka chnong yong i, u Nujorki da man sakhiat u uwa mihkhmat wa pait wa sylli wym toh uwa mihkhmat wa em ka mynsien arsap. Wei na ini i daw katni kiwa thymme na ka chnong i boon bha kiwa na ka NPP da emlang ki wa u Nujorki Sungoh.”
Neiliang won u Laiwan Lamare uwa na ka chnong Mowkaiaw, da ong u wa oo kam uwa kyrchaan borbah yaka NPP ha ki snem wa da dep, i daw wa wan u cha ka UDP toh wa yoo sakhiat u ya ki kaam u Nujorki Sungoh ha waroh ki chnong dei wym em leh chiliangkhmat. “Hawa yoo ya ki kaam yong oo, ym kwah oo i dam u kyrchaan ya oo. Neibhah ym hun oo u ieh u jngai ya kam uni u bru wa miat wa bha wa man kam uwa yahkhmat ka thaaiñ yong i.”
“Nga kjut nood oo lada kyruiñ oo cha khappood hawa ap yei klam ki manbei lyngba i Video wa ood wa yaam kiwa da chah kyntait ha Meghalaya wym yoh de ki chnong yong ki u em chapoh Meghalaya. Hawa ong kini ki manbei hanpaya kani ka sorkar u Conrad Sangma ym em de u pyrkhat jngai ki ya i, hun ki u phah ya i cha Assam, hun ki ya i u man kam kiwa khrong. Hadooh katwon ktah i ya nga hawa pyrkhat yeiwa klam kani ka manbei.”
Kamtæ da ong u wa wot heini ha khappood yong i leh du katwon tylli donhi mut ki u pynpsiah chapoh jylla yong i, tangwa kmen wa khanglaad u Nujorki Sungoh u wym chah u psiah du kattu katni donhi. Sñiawsuk yeiwa ong u Nujorki wa lym ye u wanrah waroh kitai ki chnong wa em ha khappood Assam 36 tylli, bha wow pynsyangeh chwa. Ini toh i yaklam yong ki ha Jowai heipor wa u Sniawbhalang Dhar man u kam u Chairman ka Committee pynbait pood.
“U Nujorki sakhiat man u u bru wa lui lui, u bru wa em sakhiat itæ i sñiawkhia sakhiat ya phi. Lada bakla em i maa lada phi kam ki paidbah ym khyrngiat yong bru phi. Kani toh ka por u man phi ki bru wa che wa stat. Kyrpaad ya phi u neh ka yurim wym hoi u chah pynbiej, u e phi chibor chibuit bait haka bom. Wot ha Mowkaiaw rah laær ki, ong ki ym em bru de u Nujorki, ong kiwa yahkhmat u Habahun, i da yoh i le pawa. Kani toh ka klam pynroh ka klam sarong ka klam kutlaad donhi.”
“U President UDP leh na Mowkaiaw, u General Secretary UDP leh na Mowkaiaw hawa du ki UDP ha chnong i kiwa ym piah ym pra da em chwa ki 600 tam, i kiwa wan psiah cha ka UDP na kiwa yahkhamt wa kyrchaan yong ka NPP, yong ka BJP da em i kamwa 371 ngut kammon ong ki ym em bru de u Nujorki wot ka Congress leh ym duna ko 500 Vote ha chnong i katkam wa man kattæ neibhah ka Vote em ko ha chnong i du kamwa 2557 tylli donhi. Hawa man kam kiwa yahkhmat, ym sñiawsuk i u pynroh neibhah lada pynroh i daw chem phi yei sakhiat, daw dooh i yei chaniah neitæ i daw u Nujorki khlan u ha ka chnong yong i. Lada ong ki hawa kut dei ya pynyoo paidbah para chnong leh ye i u pynsakhiat neibhah kiwa kyrchaan yong u Nujorki toh ki bru kiwa jai-jai ki wym toh kiwa heh ktien,” da ong u Laiwan Lamare.
U EC Dkhar, President UDP Mowkaiaw, da ong u wa em u yei sñiawkhia wa khroo hadooh kattæ kattæ neibynta yong phi u paidbah wa dooh wa duk wa kup chiliang wa sem chiliang. Ym jooh sñiawsuk O u pait donhi ya phi hawa maad phi yei eh ha ki chnong ki thaw yong phi, kamjooh hawa wan ood phi cha nga ym jooh kyntait O ya phi.
“Nga sñiawsuk O wa kam u President toh u pyrchang bait O u thooh laad ya phi. Khamtam ha kani ka chnong Barato, u Nujorki da man sakhiat u kam u pa yong phi. Neibhah kat i bor wa khian yong oo da pyrchang bait u yarap. Lada kyruiñ cha kani ka thaaiñ Shiliangmyntang ha ka parom kiwa mihkhmat nachwa toh u Nujorki wa tam wa lehbha sakhiat wot hadooh dang ini donhi man u kam uwa mihkhmat da embhah sakhiat phi. Ki chnong wa em ha kini waroh da yoh yarap ki kam ka Sookhlieh, Thadbamon, Musiaw, Latymphu, Moobandu, Lummuriap, Thadialong, Samatan, Thadsning, Bhain, Khliehsariang, Thangrain, Iongkwang, Barato, Mukroh, Saba, Maitdein wa Iongkynshur wym em leh chiliangkhmat u kam uwa mihkhmat kani ka thaaiñ.”
“Lada kyruin u sarok na Thadialong hadooh Thadbamon, u sarok na laad Samatan chadooh Barato na Barato chadooh Mukroh na Barato chadooh Lapangap na Mukroh cha Saba wa yingkieñ ha Mooshrot, lada kyruiñ ha Barato i yarap u Nujorki Surok hakhmat yungmane Presbyterian wot i kynroh, i siang psiang ha pchem yungmane, ka Police Outpost, ka sarok dang kreh katni cha luti lai cha Barato-B wa kiwi kiwi tangwa yoo phylla wa kam kiwi ki paralok kam kiwa rah ka Scheme heini.”
“Heipor wa wan ood kini ki heh cha u Nujorki Sungoh ileh wym ong chwa ki ya i wym boi e, ileh wym ong ki ya i wow e manda yoh manda e u MLA tæ poi katni ha ka Election yow suk u kamtre ki. Ye mo wow ngait yeini. Ym em wa ye u tuklar ha ka thaw yong i. I leh wym ye i u wan tuklar chei thaw yong ki. Neitæ i daw klam ki katwa klam tangwa tip O ki paidbah ka thaaiñ yong i toh ki paidbah kiwa da stat da tip.”
“Nga kam u President khut wer oo ya phi waroh dei mynsien wa sñiawkhia dei mynsien wa maya u yawan lang phi waroh ha ka bom khlem em i chah pynbiej i chah ngop ha kiwi tawon. Sñiawbha em ka yurim wa skem ka yurim pyrkhat jngai neibynta ka thaaiñ yong i. Lada bakla phi, pyntikna O daw sihlet phi. Hawa kamtæ ngaitskem O u Blai Kynrad wym ieh u ya u Nujorki Sungoh lyngba i maya yong phi ya oo. Nga e khublei O ya phi yei wan yong phi cha kani ka yalang khlem poi pyrkhat O yei wan tooid phi, pynyoo phi ka dak ka chin wow kyrchaan wow pynjop ya u Nujorki Sungoh,” da ong u EC Dkhar.
Neiliang won u WG Sungoh, MDC ka Mowkaiaw da ong u wa dam u wow kyrchaan ya u Nujorki ha ka Election wa dep toh wa yoo u wa dang khynnah u, tangwa manda jop u khyrngiat u yei rukom krehkaam yong oo hadooh wa nga da psiah O cha ka UDP manda yaleh Election MDC wa yoo O ya uwa mihkhmat wa da e kyrpang u Blai ya ka thaw yong i. Nga em O i kyrmen ya uni uwa mihkhmat yong i u yoh u yei kyrdan Cabinet Minister neibhah uni uwa mihkhmat da yoh u yei chaniah naneiñ tæ kyntu ya phi waroh ham pait chaneiñ cha wah wa pynbiej ka NPP ya phi ym em yumut yi yi neibhah hawa jied ya uwa mihkhmat toh u em phi ka yurim wow pyrkhat jngai ym toh u chah yahbakla. Khut ya phi waroh u neh ka yurim neibynta i kyrchaan ya u Nujorki Sungoh khnang yow yoh biang i jop wa emburom.
U Nujorki Sungoh hawa e yei klam da ong u wa hachwa u klam u da hiar da u slap tangwa yoo phylla wa ki paidbah ym em u khih klang ki, hun ki u chah slap iwa pynsakhiat yei maya ki ya nga. “Kynmoo paidbah wa uni u slap toh u slap wa kyrkhu ya nga haka Election wa khaddooh, i jooh hi wa jia ha kani ka madan ha ka yalang wa hiar u slap chwa u klam O, ynne leh i jooh hi.”
“Sniawkmen O lyngba i ngait yong nga, u Blai Kynrad wym ieh u ya nga wa pynyoo u yei kyrkhu wa daw yoh O ha ka 2 tarik lyngba i krehlang yong phi waroh. Nga kam uwa mihkhmat da kreh chitom O waroh kini ki snem. Nga da leh chitom O u wanrah ki Scheme waphær waphær wa kitkhia O kamwa da pynkupbor phi ya nga. Nga ym jooh sñiawsuk O u pait donhi yei eh yong phi, katwa ye O da pyrchang bait O.”
“Yoowsuk O wa u Sniawbhalang Dhar katni mihkhmat bha u cheini tangwa cheiwon wiar u ha kini ki snem wa dadep khamtam i por wa klam O hapoh Assembly neibynta kani ka Border Issue wa chong wa sah ki Pnar khappood yong i kamjooh heipor COVID cheiwon wiar u, kamjooh wa kini ki paralok yong oo kiwa na baar Constituency. Yoosuk wa heipor Election wan pynbiej wan kular ki ya ki khon yong nga. Lada nga won lai pynbiej O hei thaw yong ki kammon u sñiaw ki. Neibhah tip ki nga man O uwa mihkhmat wym yoh laad ki u tuklar u Control neitæ i daw Plan bha ki nga u pynrem tangwa ki paidbah wa maya ka thaaiñ yong nga toh kiwa stat bha kiwa em ka yurim wa skem.”
Da pynkynmoo u leh yei por wa klam u neibynta ka Mukroh wym chimkhia ka sorkar hapoh i yahkhmat ka NPP manda jia iwa sñiawsih wa dooh yei mynsien wa lui lui tæ ak wan ki cha Mukroh. “Iyi myntoi u pynsñiaw O hapoh Assembly lym ap ki ya nga. Nood O u ong lada ap ki wa klam O ym jia ya ki mynsien wa lui lui wei toh neidaw wym em u chimkhia ki heipor wa klam O. Nga kam uwa mihkhmat wym jooh sñiawsuk O u chong sniawbha, nga man-ka-sngi pyrkhat O kammon u wanrah i myntoi ya ka thaaiñ yong nga. Neibhah sñiawthooh O hawa ki paidbah da pynkupbor ki ya nga u mihkhmat O neibynta yong ki kaamram yong nga, toh u kitkhia bha O.”
“Yoosuk O wa kam u Sniawbhalang ya ka Police Outpost wa ki surok manda dep O u khat-ja tæ wan kam u,” da ong chooh u Nujorki.
“Kawi sñiawkhia O, ki paidbah wa mihkhmat na kani ka chnong yawan ki cha nga ong ki e sarok ya i lada e phi waroh kiwa kyrchaan na phi, hadien dep e wan paan won ki sa ka Police Outpost, lada sa kani e phi tikna waroh i na chnong Barato u kyrchaan ya phi. Tangwa manda ye u wanrah kini wot ki paralok kiwa suk u pynbaad kylla ya nga. Nga kam uwa mihkhmat lada leh bha O katwa leh sñiawthooh O wym lait O nei chah pynbaad. Wym em u sñiawphær O kani ka chnong Barato nga da dep chimkhia O u booh ka Centre yaleh Matric heini khnang wow pynsuk ya ki khon yong phi. Wot kattæ leh chynna O yei maya ki paidbah ka Barato ya nga, boon kiwa sñiawthooh ya nga tæ kyrpaad O ya phi wow sñiawbha u e laad biang ya nga yow yoh biang O u mihkhmat ya phi cha Assembly neibynta u ye chooh chooh O u wanrah ka roi ka paar kamjooh u ye O u pynku kyrdan ya ka Laskein Block cha ka Civil Sub-Division. Ngait skem O ya ki paidbah waroh khlem artatien u wan thap ki haka 27 tarik haka bom kamjooh haka 2 tarik u yoh yei jop wa em burom,” pynkut u Nujorki.
