Jowai : Ka lehniam Behdieñkhlam ka Raij Jowai ynne ka Musiang 12 tarik da wan sakhi da u MP ka Shillong Constituency u ma Vincent Pala.
Ynne ka sngi ka lehniam da sdang ko nadooh i step heiwa da pynyieñ ya ki Dieñkhlam ka Bon ha yong Rngad Wah, ka Doh ha Yung Langdoh iwa ki Dieñkhlam khian ha man la ki thlu yung. Hadien wa da pynyieñ ya ki dieñkhlam khian ki Khonraij da lai thooh ki ya ka Symbood Khnong wow pynyieñ ha Khliehchnong.
Heipor chiteiñ sngi ki Kmai Raij da yachem lang ki ha Myngkoi Pyrdi yow pynkhreh u lithooh ya ki dieñkhlam. Hachwa u mih na Myngkoi Pyrdi da em ka yalang tbian wa da pyllai da u President ka Seiñraij Jowai u ma OR Chalam, heiwa da em ki waheh wasian ka Raij kamjooh leh u MP ka Shillong u ma Vincent H Pala chirup wa ki MDC kam u A. Shullai, u M Pariat wa kiwi kiwi.
U ma Pala hei klam yong oo da e khublei u ya khon ka Niamtre waroh wei da kular u wow yaklam ha ka Lok Sabha hei yatoh wa ka lehniam Behdieñkhlam. Ha kani ka yalang da yoh leh yei klam na u Dolloi ka Elaka Jowai u ma Puramon Kynjing.
Manda kut ka yalang tbian ki Kmai Raij da mih ki neini wei da lai ki cha Iawmusiang wow rah ya ki Dieñkhlam heiwa da chaad leh ha waroh ki thaw lehniam ka raij kam ha Biar ka Blai, ha Datlawakor, wa kiwi kiwi ki thaw.
Hadien wa da pynpoi ya ki Dieñkhlam ha Madan Siatthong ki khon Raij da lai li thooh ya ka Khnong Blai na Loom Sooiung yow rah ya ka cha Sawiar.
Manda poi ha Madan Sawiar u Dolloi da e u yei pyrnah Khnong Blai ha u Kñi ka kur Nikhla wow e u ka ngooh ka dem wei ya ka yutang.
Hadien wa dep e ngooh ki Kmai Raij da rah ki ya ki Dieñkhlam cha Biar ka Blai hachwa wow rah ya ki cha ki thaw pynyieñ ha jar jiar ki dong.
Discussion about this post