Ka All Hynñiewtrep People United Front (AHPUF) waka Jaiñtia Women Awakening Movement (JWAM) da pynsñgaw ki yei wym hun wei pyrchah joor yaka sorkar jylla hajrong i thmu yong ka wow pynkut yaka Cherry Blossom Festival haka sngi Sunday itæ toh haka 19 tarik uni u bnai.
U Secretary ka All Hynñiewtrep People United Front uwa man leh u Chairman ka Hynñiewtrep Border Disput Redressal Forum, u Chandame Sungoh ong u wa neiliang ki paidbah wa chong chnong ka jylla wym jooh pynman ki kiwon kiwon ki tamasa nadooh ki Fete, ki Concert, ki Fishing Competition i yadaw masi næ kiwon kiwon haka sngi Sunday lait noh ki kaam niam, tangwa sñiawsih wa kammon won ka sorkar da yahkhmat pathan ko yaka jylla deiwa pynchlur u leh kam kini ki tamasa awria haka sngi Sunday.
U Chandame Sungoh ong haroh u wa u Paul da kylla Saul u, neibhah haka Bible em du i kylla na u Saul cha u Paul tangwa haka jylla yong i won em kiwa kylla nei pyrtuid Paul cha i pyrtuid Saul.
“I ong u Paul Lyngdoh uwa man u Montri ka chnat Tourism wa waroh ki ynñiaw sngi toh kiwa kyntang man i du ki kyntien tlep ait miaw,” da ong u Chandame.
“Hao waroh ki sngi leh man ki kiwa kyntang, tangwa tip i waka sngi wa ynñiaw toh kawa da pynman kyntang da u Blai hi, tæ lada uni u Montri toh u Christan toh u sñiawthooh bha u yeini.”
Chooh chooh da ong u wa ini i leh ka sorkar MDA-II ym du wa pynsñiawsih yaki bru ka jylla Meghalaya tangwa wot yow Blai kamjooh. Wei i yaleh wym mut du yaki bru tangwa da nood ki u yaleh wot wow Blai.
“Kam u Christan tip i wa ka Bible ong ko wa du i leh pap yong uwi u Achan da yap hadooh 3000 ngut ki chipai Israel kamtæ ini i leh ka sorkar leh ye u bi pap cha ki paaid wa chong chnong ka jylla waroh kawi”.
Kamtæ hajrong ini u Chandame Sungoh ong haroh u waka seiñ wym embynta ko wa kani ka kaam pyrchah Blai yong ka sorkar, wei u Blai leh tip u rap bha yeini.
Wei la jia wow pynhiar tput u Blai yeini, mut wa i tim u man ko ya kiwa emkti u pynman yaka kani ka tamasa.
Discussion about this post