theme-sticky-logo-alt
theme-logo-alt
Advertisement ad1
Advertisement ad1

Daw chimpor wow wai ya ka District thymme ka jylla neidaw wa joor ka khlam

Advertisement ad1
Advertisement ad1

I thmu wow wai ya ka District thymme ka jylla ha Mairang ye ko wym pu mankaam kamwa da booh por næ kamwa da pynbna da u Montri Rangbah, itæ hachwa wow lehkmen ya ka sngi laitlooid yong ka ri India, wei ye ini i thmu wow poi cha u Naikhynde wa cha u Naichiphaw, wei i daw wa hap wow pynslem ya i wai ya ka District toh neidaw wa dang ban ka khlam COVID-19.

Kam wow pynkynmoo wa ka District wa thymme daw kynthup ko ya ki chnong kiwa haap hapoh ka Mairang Civil Sub Division, wa kynthup ya ki ar tylli ki Constituency, ka Mairang wa ka Mawthadraishan. Neiliang u Montri Rangbah, u Conrad K Sangma da pynbna u wa daw wai noh leh ya kani ka District thymme hapoh yong ka 15 tarik uni u bnai.

Advertisement ad1

Hawa yaklam wa u MLA ka Mawthadraishan uwa man leh u Montri ha ka sorkar MDA, u Brolding Nongsiej da ong wa em sakhiat wa u Montri Rangbah da booh thong u wow wai ya ka District wa thymme hachwa ka 15 tarik, tangwa kamwa man katni daw hap wow kyrriah noh chwa neibhah wa ktah u khñiang khlam.

Da ong u wa ki paidbah da thrang ki wow wai noh ya ka District wa thymme, tangwa kammon wow wai ya ka District katwa ki paidbah ym yoh ki wow embynta lang, neibhah i angnood ki paidbah ki kwah ki wow pdiang ya ka District. Da ong u wa hadien wa da yaklam wei bichaar bniah deilang wa u MLA ka Mairang uwa man leh u Speaker ka yung dorbar, u Metbah Lyngdoh da man ko iwa eh wow wai ha uni u bnai neibhah wa joor i yabi u khñiang khlam, khamtam ha ka chnong Pyndenumïong kawa thmu wow man kam ka Headquarter, kawa da chah ktah joor bha ha ki kajiak sngi wa da dep hadooh wa da hap wow khangsbak syndon.

Da ong wa kam kiwa mihkhmat da pyrkhat bha wa ym ye wow wai ya ka District deiwa booh hei maa ya i chait i khiah ki paidbah, deiwa pynsñiaw leh wa rap bha wow wai ha u Naikhynde wa u Naichiphaw.

U Nongsiej da kyntu u ya ki paidbah wow yai chah ki deilang wa ka sorkar chipor, deiwa pyntip wa i yoh District ym kylla de i, tangwa daw chimpor bar ya iwa da yooluti neidaw yong u khñiang khlam.

Share this:
Previous

Da pynman Micro Containment ya ki artylli ki thaw wa em ha Mookyrdup

Next

Da pyndam yei pynman Micro Containment ya kiwa boon ki thaw ha West Jaiñtia