U Montri ka chnat Bordiñ, u James PK Sangma da klam che u wa ka sorkar daw lai ko chaphrang hajrong i thmu wow chna ya ka Umngot Hydro Power Project, heiwa da ong u wa hanla ka chnat chna ko ya ka Power Project, tangwa daw pyntikna wa ym ktah ko ya i kamai kiwa chong chnong ka thaaiñ, khamtam wa ka Dam u chna ya ka rap jngai na ka thaw uiñke.
Da ong u wa ka sorkar dang pyrchang biang ko wow pynbait yaklam wa kiwa chong chnong hajrong ini i thmu, ym du wow pyndooh yei tieñsar tangwa ki leh wow kyrchaan ki ya ka sorkar hawa wanrah ko ya kam kini ki kaam khamtam wa ka jylla chem chitom ko heiyatoh wa ki kaam bordiñ.
Kam wow kdaw heini, ki paidbah kiwa chong chnong na ka thaaiñ Mawkynrew Block ha East Khasi Hill wa na ka Elaka Darrang ha West Jaiñtia Hills ha ka tayaw wa dadep da mih paidbah ki wow pyrchah joor ya i thmu wow pynman ya ka Public Hearing neibynta wow chna ya ka Umngot Hydro Power Project kawa 210 MW, deiwa ong wa ini daw ktah i ya ki thaw rep wa kamjooh ya ki thaw uiñke suwari.