U Montri ka chnat Puræ Puthi ka jylla, u Lahkmen Rymbui, ynne ka sngi da pyntip u wa kiwa pynlai ya ki thaw puræ da mynjur ki wow pteiñ yei rukom pynman skur iwa katni tangwa em hi kiwa ym em mynjur yei pynman skur nadooh Nursery hadooh Class 5.
Da ong u leh wa kiwa pynlai skur da pynsñiaw ki wa ym yoh myntoi ki khynnah da ki Online Class heiwa ki bei ki pa ki khynnah leh da ong ki wa ym yoh ki khon ki ya i sikai wa biang lyngba ki Online Class.
Da pynche u leh wa ym em pynbor wow wan skur wei ini chong ko leh hei stat kiwa pynlai ya ki skur wow pynbait yei rukom pynman skur.
Da ong u leh wa ki bei ki pa kiwa ym sñiaw chngaaiñ wow phah skur ya ki khon yong ki ye ki wow jied da ki Online Class wei ka sorkar na ki por cha ki por daw chong pyrkhat ko ya ini.
Da khana u leh wa kiwa sikai toh u yoh ki leh yei dawai yada COVID-19 neidaw wa hap yachem ki wa ki khynnah man-ka-sngi.
Hawa jubab yeiwa kylli, da khana u wa ym duna ya 75,000 ngut kiwa sikai kiwa em ha ki skur sorkar wa ki skur ki bru samen.
Da pyntip u leh wa ya ini waroh daw lai rah hakhmat ka sorkar yow chim ya i rai wa khaddooh.
