Kamwa dang ini wa dep ka sorkar jylla Meghalaya da wanrah ko da ka rynsan wa kyrpang neibynta ki paidbah wa maya wa ka-it Football ha kani ka samoi FIFA World Cup 2026 deiwa chna ya ka Football Fan Park ha SRGT Parking Lot Polo, Shillong, heiwa ha kani ka thaw da booh da ka Screen LED wa heh yow pynyoo Live ya ki yalehke khlem da emkaam su poisa kiwa wan paitke.
Neiliang u Montri ka chnat Sports and Youth Affairs ka sorkar jylla, u Wailadmiki Shylla ynne ka sngi hawa klam cha kiwa thoh khubor heipor wa lai li pait u yei pynkreh ya ka Aitnar ka Seiñraij Ialong kawa haap hapoh ka Constituency yong oo, da pyntip paidbah haroh u wa kam kani hi ka jooh ka rynsan Football Fan Park daw chna sa ha Jowai wa Tura.
Kam u Montri ka chnat Sports ong u wa hadien i yahkhmat u Montri Rangbah ka sorkar jylla wow chna ya ka Football Fan Park hapoh madan Polo, wei wa da sakhi yei chongchit ki paidbah u wan pait wan e kyrchaan ya ki ri wa ki yachah ki ha kani ka World Cup, kamjooh leh wa ki bru ka jylla Meghalaya toh kiwa maya bol bha, kamtæ neiliang ka Sports Department lyngba i yah luti u Montri Rangbah da rai ki wow chna sa ar tylli ki Football Fan Park kawi ha Jowai wa kawi ha Tura.
Ong u kamwa u sdang noh hi ka Round 16 yong kani ka yalehke, kamtæ lyngba kini ki Football Fan Park, ki bru wa maya wei chongchit bol u yoh ki ya ka rynsan u yachemlang ka wow rap pynsñiawsuk wei pynchongchit chooh chooh ya ki.
Neibynta u chna Football Fan Park ha Jowai, ong u wa dang thooh thaw kattæ neibhah wa katkam i kwah toh hei thaw wa man pyrdi yow suk ki paidbah wa wan pait. Wei hadien wa yoh yei thaw wa tikna ong u daw pyntip won cha ki paidbah.
Discussion about this post