Ynne ka sngi u Montri Rangbah ka jylla, u Conrad Sangma da booh u ya u mooyurim wow chna ya ka Dairy Campus hapoh ka National Programme for Dairy Development (NDPP) ha chnong Mukhla Umlangshor, West Jaiñtia Hills ha ka yalang wa emlang u MLA ka Jowai, u Wailadmiki Shylla.
U GHP Raju, Principal Secretary ka chnat Veterinary & Animal Husbandry da pyntip u wa kani ka Campus daw chna ya ka ha i lut wa T. 9 Klur lyngba i yoh poisa na ka NPDD wei daw yarap bha ko ya ki kynthai kamjooh ki khynroo khyllood wow seiñ kreh ki deiwa psan mrad.
U Wailadmiki Shylla hawa e i klam da ong u wa i kaam psan mrad man ko kawa heh dooh hapoh ka ri wei i pynkrehkaam ya ka NDPP hapoh ka District daw sakhi yei roi i kaam psan mrad hapoh ka District deiwa kyntu wei e nongmuna wa ki bru ym psan de ki ya ki masi du wow yoh doh tangwa wot wow yoh dud leh kamjooh ya iwa ye wow chna baam ha kiwa boon rukom.
Neiliang u Conrad Sangma da ong u wa ka sorkar da yaleh bha ko wow wanrah ya ki kaam pynroi liang wanang hapoh ka jylla khamtam ki kaam wow yoh khih yoh kreh ki khynroo khyllood.
Da ong u wa man-u-snem da em 50,000 ngut ki khynroo wa mih hapoh ka jylla kiwa emkaam kreh, iwa mut wa emkaam wow seiñ kreh neibynta yong ki wei i kaamram ka sorkar toh wow wailaad yow yoh kreh ki waroh.
Chooh chooh da ong u wa ka NDPP man ko kawa emkaam bha ha ka jylla wei katni 12 lak litre i dud ha ka chi bnai pynmih ka jylla katwa pynemkaam won 200 lak litre wei kam kani ka Programme daw ye ko wow pyndap yeiwa duna.
Kani ka thaw (Dairy Campus) kawa T. 9 klur daw ye ko u e kreh ya ki 2,000 ngut ki bru wei da booh thong wow chna pyndep ya ka hapoh u Khonchonglad (Dec) 2022 heiwa neiliang yong oo leh daw booddien u ya i kreh ya kani ka thaw.
