Shillong: U symbood montri rangbah ka jylla, u P. Tynsong ynne da booh mooyurim u wow chna pynku kyrdan ya u sarok na Laitkor-Pomlakrai-Laitlyngkot hei emlang u Chairman ka Meghalaya State Planning Board uwa man leh u MLA/MDC ka Nongkrem Constituency, u Lambor Malngiang u Gavin M Mylliem, Chairman, MKVIC wa kam u MLA ka Sohra Constituency.
Ya ini i kreh da e poisa da ka World Bank hapoh ka Meghalaya Integrated Transport Project, kawa da kynjoh T. 30.9 klur wei uwa jrong 15.358 km.
Hadooh katni ka sorkar da pynlait ko dang 10 tylli ki Scheme hapoh ka Meghalaya Integrated Transport Project.
U Tynsong da ong u wa ka sorkar yaleh ko u pynmiat ya ki sarok hapoh jylla wei u sarok na Laitkor-Pomlakrai-Laitlyngkot daw yarap ko wow pynkyllooid ya ka sor Shillong, wei katni dang pynkhreh ya ka Detailed Project Report yong u Shillong Western Bypass u wow pynyabi ya ka Laitjem wa Kyrdemkulai.
Da ong u leh wa ka bynta wa 3 yong ka PGMSY daw sdang noh ko neini wei ka sorkar pyrdi da e ko T. 1000 klur ya ka jylla wow wanrah yei kaam pynroi ha ka jylla.
U Lambor Malngiang da pynsñiaw u yei mynsien wa kmen hajrong ini i kreh wei da kyntu u ya waroh wow ekti ki wow pyndep smat u chna ya uni u sarok.
Da yooluti u leh wa deiwa pyndep ya uni u sarok daw yarap bha u ya ki paidbah ka thaaiñ.
Ha kani ka sngi da emlang leh ki sahep ka chnat PWD, ki Rangbah Shnong wa kiwi kiwi.
