U montri rangbah ka jylla, u Conrad K. Sangma ynne da wai u ya ki yung skur thymme ka Garobadha Secondary School wa ka Rangsakona Higher Secondary School ha South West Garo Hills, hei emlang u montri ka puræ puthi, u Lahkmen Rymbui, ki MLA, u Zenith Sangma wa u Ferlin Sangma.
Ya kini ki yung skur da chna deiwa yoh yarap poisa na ka Asian Development Bank (ADB) hapoh ka “Supporting Human Capital Development in Meghalaya” heiwa T. 1.85 klur ya ka Rangsakona School, wa T. 3.09 klur ya ka Garobadha School.
Kini ki yung skur toh chibynta yong ka 100 Million US Dollar (INR 650 klur) ya ka jylla heiwa da chna yung skur thymme ha ki 117 tylli ki skur ha ki 11 District.
U Conrad hawa e yei klam da ekhublei u ya ka chnat puræ puthi wa ka ADB kawa da yarap ya ka jylla.
Da pyntip u leh wa ka sorkar jylla da bahkhlieh ko wow pynmiat ya i puræ puthi nadooh ki kyrdan wa dang khian.
Da ong u wa ha uni u snem daw chna pynmiat ya ki 200 tylli ki skur LP ha ka jylla heiwa daw yoh ki T. 40 lak kawi ka skur wei ha ki le snem wow wan daw ye u chna pynmiat ya ki 800 tylli ki skur.
U Conrad da pyntip u leh wa em kamwa 2000 tylli ki skur sorkar LP ha ka jylla kiwa emkaam jhan bha wei neidaw wa duna poisa ha ki snem wa dadep, ka sorkar da rai ko wow yarap noh ya ki neibynta ki khynnah.
Da pyntip u leh wa ka sorkar da pynlait ko T. 12 klur wow chna ya ki yung thymme ka Williamnagar Govt. College wa ka Captain Williamson Sangma Memorial College ha Baghmara.
Heiyatoh wa i duna ka Pass Percentage ha South West Garo Hills, u Lahkmen Rymbui da ong u wa na ki 100 ngut, em 74 ngut ki khynnah wa Fail ha South West Garo Hills wei katni ka sorkar da chna ko ya ka Committee wow tip ya i daw tre hajrong ini khnang wow ye u leh yeiwa emkaam.
Da ong u leh wa ka sorkar ymye ko wow pynbait yeini tangwa emkaam yei yakrehlang yong waroh.
U MLA ka thaaiñ, u Zenith Sangma da yaroh u ya u Conrad wa da wan wai u ya kini ki yung skur thymme hapoh ka Constituency yong oo.
Ya ka sngi da pynphooh da ki chaad wa ki rwai na ki khynnah kini ki ar skur.