theme-sticky-logo-alt
theme-logo-alt

Daw chna ya ka P.A. Sangma Medical Skill Hunar Hub ha West Garo Hills kawa T. 150 klur

U Montri Rangbah ka jylla, u Conrad K. Sangma hei emlang u Montri ka chnat i chait i khiah, u James P.K. Sangma, uwa e buit ya u Montri Rangbah, u Thomas A. Sangma ynne da booh mooyurim ki ya ka P.A. Sangma Medical Skill Hunar Hub ha Dumindikgre, hajan Babadam, West Garo Hills.

Ya kani ka yung daw chna deiwa yoh yarap poisa naka Ministry of Minority Affairs hapoh ka Pradhan Mantri Jan Vikas Karyakram, wei da pynkreh ya ka da ka chnat Social Welfare ka jylla. 

Kani ka Medical Skill Hunar Hub u e sikai ko ya ki Nurse wa kiwi ki kaam wa yatoh wa i chait i khiah namo Paramedics.

Neiliang u Conrad hawa e yei klam da e khublei u ya u Montri Rangbahdooh ka ri, u Narendra Modi wa u Montri ka Minority Affairs u Mukhtar Abbas Naqvi neibynta kani ka Meidical Skill Hunar Hub deiwa ong wa kani ka thaw daw yarap ko wow pyndap yeiwa emkaam ha ka jylla. 

Da ong u wa ka jylla da chem chitom bha ko nei wan ka khlam COVID-19 ha ki le snem wa dadep wei emkaam wow pynkut noh yei duna kiwa kreh ha ka chnat i chait i khiah. 

Chooh chooh da ong u wa ka sorkar wa katni da yaleh ko wow pynjanai ya ka chnat i chait i khiah khnang wow ye u e i chakri wa pura ya ki paidbah ha ki por wow wan. 

U James P.K. Sangma da pyntip u ya ki kaam wa da leh ka sorkar wow pynmiat ya i e chakri ya ki paidbah khamtam ha i chait i khiah ha ka jylla waroh kawi. 

Da ong u wa ka Medical Hunar Hub daw kyrchaan ko yei emkaam ka jylla ya kiwa kreh wei wow pynkreh pura ya ka Preventive Health Care katkam ka Meghalaya State Health Policy.

Ya ka P.A. Sangma Medical Skill Hunar Hub daw chna ha i lut wa T. 150 klur heiwa daw chna leh ya ka 300 Bedded Multi-Specialty Hospital ka wow em leh ya ka thaw hikai Nursing College, ka Pharmaceutical College, Paramedical College wa ka Skill Development Centre chirup wa ki Hostel. 

Share this:
Previous

Da pynman ya ka e sikai ya ki waheh chnong hajrong ka “Human Trafficking” 

Next

Wa joor wa pai wei jæd ka yung skur Ummat Lakadong Government LP School lai ujor ka KSU