Hadien ki phaw tylli ki snem wa sahteiñ i chna ya ka Iawmusiang Multi Storeyed Shopping Complex, i kaam da man iwa sahkut hadooh kini ki sngi leh.
Ynne won u MLA ka Jowai, u Wailadmiki Shylla chirup wa u Commissioner Secretary ka chnat Finance wa Urban Affairs ka jylla, u Dr. D. Vijay Kumar, hei emlang u Executive Engineer ka PWD (Building) u P. Lhuid wa kiwi ki sahep da hiar ki cha Iawmusiang wow pait yei man i long kani ka yung pynman yaaw.
Hadien ini ynne i janmiet ha Circuit House da chong yalang ki hei emlang u DC ka West Jaiñtia Hills u BS Sohliya heiwa da chong pyrkhat ya ki kaam wa yatoh waka sor Jowai.
Hawa yaklam wa u Wyrta hadien ka yalang, u Wailadmiki da ong u i kreh da sdang i nadooh u 2006 wei i kreh da man iwa thut nadooh itu i por.
Chooh chooh da pyntip u wa neiliang u Contractor wa kreh khaddooh da sangeh syndet u yei kreh wei katwa phah kot cha oo wow pteiñ yei kreh ym jubab u katwa kamtæ da khut kreh (Tender) noh da kawi wei heitæ uni u Contractor da yaleh mukotduma u pyrchah yeini wei hadien ini da randien uni u Contractor manda dep yaklam yasuk wa oo.
Kamtæ u Wailadmiki da ong u wa hadien ini da sñiaw wa emkaam u sylli yei chongtre ki chrot ha kani ka Complex neibhah i kreh da sdang i nadooh u 2006 wei yeini daw phah sylli ha ka IIT Guwahati neibhah ki naar-rod da man ki kiwa sap sarah lut wei emkaam u tip kammon i man i tre yong kini ki chrot namo ka Foundation khnang wow tip kammon u lai chaphrang wa ini i kreh.
Heijooh i por da ong u wa emkaam wow pyntikna wa hawa pteiñ i chna ya kani ka Complex u man iwa chngaaiñ katwa kamtæ emkaam wow tih bniah yei man i long i yurim kini ki chrot.
Da ngait skem u leh wa deiwa wan u Dr. Vijay Kumar ynne daw ye u pynkhreh biang ya i dor wa i lut i sep heiyatoh wow chna ya kani ka Complex wei daw emkaam wow chna biang ya ka DPR wa i kheiñ sap chwa wow ye u sdang biang i kreh ha kani ka thaw.
Discussion about this post