Shillong: Ka kynhun yong ka sorkar Meghalaya Democratic Alliance (MDA) hapoh i yahkhmat u Montri Rangbah, u Conrad K Sangma da dawa ki na u Home Minister ka sorkar India, u Amit Shah wow pynkrehkaam noh ya ka Inner Line Permit ha Meghalaya.
Hadien ini i yachem kawa man ha i por 12:30 i pyrdi synyaw ynne ka sngi, ka sorkar jylla da rai ko wow khut jhan noh ya ka dorbar kyrpang wa chisngi yow chim yaka rai wow dawa ILP yow lai rah hakhmat ka sorkar India.
Da yoh yutip wa ha ini i yachem, u Amit Shah da chah ckhor bha u yei dawa yong ka sorkar MDA wei da kular u wow bichaar bniah hajrong kani ka kaam deiwa smat.
Ha ini yachem, u Conrad da pynsñiaw u leh ha u Amit Shah ya i duna ki marbaam hapoh ka jylla Meghalaya na ki daw yong ka yakhih ha waroh kawi ka jylla Assam.
Ha ini i yachem wa u Amit Shah da emlang leh u Speaker ka Meghalaya, u Metbah Lyngdoh, u Prestone Tynsong, u A.L. Hek, u Banteidor Lyngdoh, u Sniawbhalang Dhar, u Hamlet Dohling, u Samlin Malngiang, u Saleng A Sangma, u Lambor Malngiang wa u Thomas A Sangma.
Kam wow pynkynmoo wa ynnin ka sngi ka nongbah Shillong da khihwin ko hadien wa ki paidbah kiwa em da ki phaw hajar da mih sarok ki wow dawa ya ka Inner Line Permit ha ka jylla, hadien wa ka sorkar India da mynjur ko ya ka Citizenship Amendment Bill, ini i mih ki paidbah da pynbait wei da pynbor ya ka sorkar MDA wow dawa bait ya ka ILP na ka sorkar India.
Discussion about this post