Ki khynnah puræ wa yakhun ya ka Exam HSSLC kawa da sdang nadooh ynne ka sngi kawa da pynman da ka Meghalaya Board of School Education (MBoSE) da lai ki wow thoh ya ka Exam khlem iwon iwon i chah pynthut wot hapyrdi wa ka nongbah Shillong da chah ktah ko ha i liang ka suk ka saiñ ha kini ki sngi wa da dep.
Hawa yaklam wa ki kattu katni kiwa pynlai skur da pyntip ki wa ka Exam da lai bait ko lait noh i thut ha i wym biang por neibhah wa em i chah thlia ki khynnah wei kamjooh kiwa sikai, tangwa ya kitæ leh da ye wow pynbait da i em ki Admit Card wa ki School ID.
Kam wow kdaw wa waroh da em 82,031 ngut (HSSLC wa SSLC), heiwa yaka Exam HSSLC da sdang ynne ka sngi wei ka SSLC won daw sdang ha ka 4 tarik uni hi u bnai. Ha ka SSLC daw em 51,334 ngut ki khynnah wow yakhun, katwa ha ka HSSLC dawa em 30,697 ngut ki wow yaleh ha ka chnat puræ Arts, Science, Commerce wa Vocational Course.
Hawa yatoh wa i pynlai bait ya ki Exam ha ki thaw puræ kawa da sdang nadooh ynne ka sngi, u Montri Rangbah ka Meghalaya da ong u wa ka sorkar ym ye ko wow pynsangeh ya ki Exam neibhah daw ye ko wow ktah ya ki 80,000 ngut ki khynnah wa yakhun yaki Board Exam yong ki.
Da ong u wa hanla em i long i man kawa ktah ya ka suk ka saiñ, tangwa ka sorkar paitbniah ko ha waroh ki thaw yaleh Exam khnang wa ym em iwon iwon i pynthut næ i tkoh.
Discussion about this post