Ka Khasi Hills Autonomous District Council (KHADC) u lai ko chaphrang yei pynman yaka Dorbar Mang Tangka, hanla yatyngkhooh tarik waka Dorbar Mang Tangka ka jylla. Ka Dorbar Mang Tangka ka Meghalaya Legislative Assembly u sdang ko nadooh ka 4 hadooh 17 tarik u bnai wow wan, katwa ka KHADC u pynman ko ya ka dorbar nadooh ka 8 tarik.
U Chairman ka KHADC, u Lamphrang Blah da pyntikna u wa ka Dorbar Mang Tangka 2022-23 u man ko nadooh ka 8 tarik, wei da khut ya ka dorbar katkam ki kyndon ka Sixth Schedule wa hap bait u pynman chisien hapoh 4 bnai.
Ka KHADC em ko hadooh 4 ngut ki MLA wa man MDC wa kynthup ya u Deputy Chief Executive Member uwa ksoh ya ka chnat muna tangka ha KHADC uwa man u MLA ka Mawshynrut, u Gigur Myrthong.
Hawa kylli lada ktah ko ya ka dorbar ka KHADC, u Blah da ong u wa i em ki MLA kiwa man leh ki MDC kiwa hap lai cha waroh ar tylli ki dorbar ym ktah i, neibhah ha ki por wa dadep da em i tyngkhooh wei ki MLA ye ki wow wan deiwa pynchong yurim katkam ki kaam wa da wanrah hapoh ka dorbar.
