15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Daw lai bait ka lehniam Behdieñkhlam ka Raij Jowai khlem embynta ki paidbah

Advertisement ad1
Advertisement ad1
Advertisement ad1

Jowai: Ka Seiñraij Jowai ynne ka sngi da pyntip ko wa ya ka lehniam Behdieñkhlam yong ka Raij Jowai ha uni u snem u man ko kawa lai bait wei u sdang ko nadooh ka 5 tarik hadooh ka 8 tarik u Naiynñiaw deiwa bood ya ki kyndon wa booh ka sorkar lyngba ka chnat i chait i khiah namo ki Special Operating Procedure (SOP).

U President ka Seiñraij Jowai, u OR Challam da ong u wa hadien wa da chong pyrkhat ka seiñ chirup wa ka Dorbar Niam wa ki Dorbar Chnong heiyatoh wa kani ka lehniam kam heini i por wa em ka khlam u COVID-19.

U Challam da pyntip u wa ka sorkar da e ko ka hukum wow ebor wow pyndep ya ka Behdieñhlam deiwa da booh ya ki kyndon wow bood heipor wa pyndep ya ka lehniam.

Da pyntip u wa ym chah ya kiwa wan paitke, ki paidbah wow wan sakhi ya ka lehniam wot hadooh ki khon ka Raij kiwa em hapoh ka Jowai deiwa kyntu ya ki wow bood ya kini ki kyndon.

Chooh chooh da pyntip u wa ye hi u chaad ha jar jiar ki yung ki sem yong ki khlem mih paidbah næ mih yonglang cha sarok wei yeini dadep leh kam ha ka Chaad Sukra uni u snem heiwa kiwa chimbynta da chaad ki ha jar jiar ki yung yong ki. 

Heiyatoh wa ki kaam niam, neiliang u Dolloi ka Elaka Jowai u Puramon Kynjing da ong u wa ya ka lehniam da sdang nadooh u Wisu (March) uni u snem wei da pyndep ya ki sarin lehniam wa boon yong ka Behdieñkhlam deiwa bood ya ki kyndon sorkar.

Da pyntip u wa ha kani ka 28 tarik uni u bnai daw pyndep ya ka lehniam Knia Pyrthat heiwa daw chimbynta ki Soo Langdoh deiwa kyntu ya ki paidbah wow ngait wow bood ki yeiwa pynlai kiwa kitkaam niam khnang wa ka knia u man ko kawa jop.

Chooh chooh da ong u wa kam ki bru em i ngait skem wei i chaniah ha ki Blai wei i lehniam kam ka Siang ka Pha, ki Knia, Ka Ngooh ka Dem, ka suit ka choor, wa kiwi kiwi u man i dei emlang ki Blai ki Syiem.

“Hanlada ym yoh u embynta wow chaad niam, kyntu O ya ki paidbah wow bood ya ki kyndon ka sorkar wei wow em i yei mynsien wa kmen kamwa jooh man ha ki por wa dadep,” da ong u Dolloi.

Da pyntip u leh wa ha uni u snem ym em ki rong ki rup næ ki rot wei ym chah ya ki paidbah wow wan sakhi ya ka Behdieñkhlam ha Syiem Aitnar tangwa du ki yung wa em talawiar yong ka wa ye u pait yeini na yung yong ki.

Da pyntip u wa daw em ar tylli ki Dieñkhlam kiwa kynthup ya ka yong ki Kmai Raij wa ka yong ka Rngad Wah wei heipor wa pynhiar ya kini ki Dieñkhlam ym chah wow chimbynta ki paidbah kamwa jooh.

Ki Wasan daw mih ki na Yung Langdoh wow lai choh thyndai ha man ki thyndai yung khnang wow yoh i yei yada na ka kjut ka khlam wa i sih i roi.

Neiliang u Secretary ka Seiñraij Jowai, u A. Sumer da ong u wa kam ki khon ka Niamtre ymhoi wow sñiawrem ki wa ha kani ka kynti ymyoh ki wow embynta ha kani ka lehniam tangwa emkaam wow man kiwa kmen kiwa ka-it mynsien neibhah wa da ye wow pyndep ya ki lehniam kiwa man chibynta yong ka Behdieñkhlam.

Da kyrmen u wa hadien wa pyndep ya ka lehniam Behdieñkhlam daw ye u yoh yei miat i bha ya waroh lang.

Share this:
Previous

17 ngut kiwa da chait na u COVID-19 ha Mizoram

Next

Yoh COVID-19 sa 1 ha Meghalaya wa liwan na Assam