Ynne ka sngi ka Meghalaya Pradesh Congress Committee (MPCC) da pynman ko ya ka yalang wow pdiang burom ya ki san ngut ki dkhot cha ka seiñ ya kiwa kynthup leh ya ki MLA warim ka Party u PN Syiem wa u RG Lyngdoh uwa da jooh man leh kam u Montri ka sorkar.
Hadien wa kut ka yalang da yoh wow yaklam wa u President ka MPCC, u Vincent H Pala heiwa da ong wa Congress toh ka Party wa kreh neibynta waroh khlem ñiaw chiliang ya ki Garo, Khasi næ Jaiñtia wei daw lai u cha kylleiñ ka jylla wow khut biang ya ki dkhot warim yong ka wow wan uiñ biang ki cha ka Congress, wei i sñiaw yaphær jaitbru hapoh jylla ye i u mih du lyngba ki Social Media tangwa ka seiñ hi kreh ko neibynta waroh.
Heiyatoh wa i khut wow uiñ biang ki MLA warim ka Party kiwa kynthup ya u MLA wa katni na Pynthorumkhrah, u AL Hek wa u MLA warim ka Party na Mawsynram, u PN Syiem, neiliang u Vincent da ong u wa ym em iwon iwon i eh i khoo heiyatoh wow pdiang ya ki cha ka Party deiwa pynrap leh wa ympu yoh u wow yaklam wa u Hek hadooh katni wei ka Party hi u pdiang ko ya kiwon kiwon kiwa kwah u psiah cha ka.
Chooh chooh da ong u wa hadien wa man u kam u President ka Party da yaleh u wow pynwandur ya i rukom krehkaam ka Party wei mar dep itæ waroh daw sdang u pynjoor ya i pdiang (Enrollment) dkhot cha ka seiñ.
Heiyatoh wa ka Election MLA cha ka dorbar chna aiñ ka jylla ka wow man ha u snem 2023, neiliang u Vincent da pynkynmoo u wa dang em sa chi snem chiteiñ wow man ka Election wei da kdaw u yei kam ka BJP ha ka Election wa dadep (2018) heiwa ka BJP da kam ko wa kamwa 14-15 ngut ki MLA ka Congress u psiah ki cha ka (BJP) tangwa ha kani ka kynti chong hei booh thong ka Party Congress wei emkaam wow kreh chitom wow poi cha ka thong.
Da ong u leh wa i kaam saiñ hima kylla i kat dang yah i por heiwa da ong u wa ha ka Election wow wan ym chong de i ha ki yalang paidbah kamtæ da emkaam wow pyntip wei wow kynjoh cha ki paidbah ya i angnood ka Party lyngba ka Social Media.
