Ka Inquiry Commission ka Meghalaya kawa takit yeiwa da jia yasiat ha chnong Mukroh wa da leh da u Justice (Retd) T. Vaiphei samen, daw lai hiar cha ki thaw wa jia ini waroh hadien wa dep u takit ya u SP ka West Jaiñtia Hills ha itu i por, u Bikram D. Marak.
Da pyntip u leh wa ya u SP daw kylli takit ya oo ha kani ka 6 tarik u Naichiphaw. U Vaiphei da ong u wa ym ye u ong hadooh katwon u chimpor ini wei ymtoh ka yakob katwa ye u pyndep smat.
Ka Inquiry Commission ka Assam da pyndep ko ya ka takit ha uni u bnai wei da phah ko leh ya ka Report kawa da leh da ka Justice (Retd) Rumi Kumari Phukan samen.
U Vaiphei da ong u leh u lai u katkam wa sñiaw biang u wei daw pyrchang u wow pyndep chwa u kut u Khonchonglad (Nov) uni u snem.
Kam wow pynkynmoo wa ha u Khonchonglad ynnin u snem da dooh yei mynsien ki 6 ngut heiwa 5 ngut toh kiwa chong chnong ka Mukroh hei yasiat ki pulit Assam wa ki Forest Guard ka Assam.
U Vaiphei da ong u leh wa sñiawkmen u yei rukom lai ka takit kattæ chooh deiwa ong wa waroh toh u yoh laad ki wow wan chakhmat neibhah em boon kiwa ya embynta ha ini wei da yoh u yei ya krehlang kiwa boon nadooh ki muktiar kiwa na Assam, kiwa sakhi, ki pulit wa ki heh ka chnat Forest.
U Vaiphei da ong u wa waroh toh u yoh laad ki u pynsñiaw wei du hadien itæ u tip yei sakhiat.
Ynnin ka sngi da em i takit ya u Aiborlang Shadap, MDC ka Barato-Mukroh Constituency wa u waheh chnong ka Mukroh, u Hamboydei Sumer da ki muktiar ka Assam.
Ya ka Meghalaya da mihkhmat u AS Pandey wa u A. Sharan kam ki muktiar katwa ya ka Assam da mihkhmat da u PN Goswami, Additional Advocate General, Assam deilang wa u D. Gogoi u muktiar ka Assam. Da em leh u TL Jyrwa, u muktiar neibynta ka chnong Mukroh wa u J. Shylla neibynta ka Commission.
Sa uwa khaddooh wa hap wow takit toh u Bikram D. Marak, SP warim ka West Jaiñtia Hills wei da pynjur wow leh yeini ha ka 06-10-23 heipor 11:30 i step.
Discussion about this post