Ka yalang yong ki ar tylli ki Regional Committee da rai ki wow lai jngieh ya ka thaaiñ Desh Domrea ha u Naisaphra wow pynlai chakhmat ya i pynbait pood ha ka wat kawa ar hapyrdi ka Meghalaya wa Assam.
Ki artylli ki Regional Committee yong ka Meghalaya wa Assam ynne ka sngi da yachem ki ha Assam State Guest House, Koinadhara, Khanapara, wow yaklam pynbait pood ha ki 4 tylli ki thaw khappood yong ka Ri-Bhoi District wa Assam.
U Chairman ka Regional Committee ka Meghalaya, u Prestone Tynsong da ong u wa ha i yachem ki Regional Committee wow pynbait ya ki 3 tylli ki chnong kiwa hap ha khappood, kitæ ka ka Desh Domreah, ka Nongwah Mawtamur wa ka Borduar. Da ong u wa waroh 2 tylli ki Regional Committee daw lai jngieh ki ha ka 26 tarik u Naisaphra ya ka thaaiñ Desh Domrea wow tip bniah ya i long i man yong ki thaw wa ki paidbah.
U Prestone da ong u wa hadien wa dadep ya ki 3 tylli ki thaw daw pteiñ won i yaklam ya ka Block II.
Ha ini ki yachem ki ar Regional Committee da yoh leh u klam ya u Prestone Tynsong kam u Chairman ka Ri-Bhoi Regional Committee hei emlang ki MLA ka Ri-Bhoi kiwa kynthup ya u Sosthenes Sohtun, MLA ka Jirang, u Charles Marngar, MLA ka Mawhati, u Damanbait Lamare, u MLA ka Umroi, u Pynïaid Sing Syiem, CEM ka KHADC uwa man kam u dkhot ka Regional Committee, u Arpit Upadhyay, u Deputy Commissioner ka Ri-Bhoi District wa kiwi ki sahep wei neiliang ka Regional Committee ka Assam da emlang da u Atul Borah wa u Chandra Mohan Patowary kiwa man ki Montri sorkar ryngkat ki sahep sorkar.
Discussion about this post