U Montri Rangbah ka jylla, u Conrad K Sangma da ong u wa iyi wa ka sorkar daw leh ko u man i katkam ki kot ki sla wa katkam ka aiñ wei man iwa emkaam wa ki heh ka sorkar Punjab u tip ki wa i thaw toh i yong ka sorkar hadien wa da soi ya ka sorskular wa ka Hima Mylliem.
Da ong u wa ka sorkar da chimpor ko hadooh 3 snem, hadien wa da puræ bniah bha wow rai kammon u leh wow lai chaphrang heiyatoh wa ka Them Metor kawa em ha Them Iewmawlong, wei i wow leh ko toh katkam ka aiñ bait.
Chooh chooh da ong u wa ka sorkar da phah ko ya ki bru wa sah ha ini i thaw wow sah noh cha i thaw wa da pynkhreh da ka sorkar wei ini ymtoh iwa beh beiñ wei ieh ha sarok wei ki bru kiwa kreh ha ki chnat sorkar daw chah kyrriah ki cha i thaw wa ka sorkar da pynkhreh ko neibynta yong ki.
Heijooh i por da ong u wa ka sorkar da burom ko yeiwa ka National Commission For Minorities wa ka National Commission for Scheduled Castes pynsñiaw ko deiwa pynrap wa hajrong ka Status Quo, ka sorkar da pynkhreh ko wow yakhun bait ha Kasari.
Hajrong i kam ka Harijan Panchayat Committee wa ya ini i thaw da e sñiawbha da u Syiem ka Hima Mylliem nadooh nachwa, neiliang u Conrad da ong u wa ka High Level Committee da elaad ko ya ki wow pynbiang ya ki kot ki sla da boonsien tangwa ymye ki wow pynpoi næ pyntip wei ym em u rah ki ya ki kot ki sla.
Hajrong i tuklar ka sorkar na Punjab, u Conrad da ong u wa ymye wow khang ya iwa pynsñiaw ka sorkar Punjab neibhah wa hap klam ko neibynta ki bru yong ka hi, tangwa emkaam wow sñiawthooh leh wa iyi wa ka sorkar Meghalaya da leh ko toh katkam ka aiñ, ym wow chim wa em i banbeiñ yeiyi yeiyi.
