Shillong: Ka United Democratic Alliance (UDA) ynne ka sngi da kam ko wow chna yaka Executive Committee wa thymme ha Khasi Autonomous District Council (KHADC) hadien wa i boon ki MDC da ku i cha ka 15 ngut.
Hawa yaklam wa ki laad pathai khubor, u MDC ka NPP, u Pyniaid S Syiem da ong u wa ka UDA daw lai wow pyntip ya i boon paaid hakhmat u Lat ka jylla, u Tathagata Roy ha ka sngi nyngkong yong ka tayaw wow wan, neibynta wow yoh u chna biang ya ka Executive Committee.
U Dy. CEM warim da pynsñiaw u wa ka UDA da skem ko wei da kam u leh wa ym em ki MDC ka UDA ki wow yut napoh yong ki, deiwa pynrap leh wa i kam yong ka UDF wa daw em ki MDC ki wow lai cha ki toh du wow pynsñiawthooh bakla.
Da ong u wa hadooh katni ki kaam ha KHADC man ki du kiwa neh ha suiñ neibhah ka UDA næ ka UDF ym ye næ ym em bor ki wow pynlai ya ka kaam, wei ya u Latiplang Kharkongor leh ym pu em tipmit kam u CEM.
Hawa kylli, u Pyniaid da pyntip u hadooh ynne ka sngi daw em sa 2 ngut ki MDC ka UDF kiwa thmu wow kyrchaan noh ya ka UDA.
Heiyatoh won wa ki 2 ngut ki MDC ka NPP kiwa da lai kyrchaan ya ka UDF, neiliang u Pyniaid uwa man leh u Secretary ka Parliamentary Party ka NPP ha KHADC da ong u wa da pyntip ya ini i leh pyrchah yong ki cha ka NPP East Khasi Hills, wei kiwa yahkhmat da chimkhia ki wow pynbait ya kani ka kaam wa kini ki MDC u wan uiñ biang ki cha ka UDA.
Discussion about this post