Shillong: U Luizinho Faleiro u heh ka AICC wa pait ya ki jylla ka thaaiñ mihsngi da ong u wa ki Party wa em waka North East Democratic Alliance (NEDA) ym toh u yooluti ki wow yoh myntoi ki deiwa embynta ki waka BJP.
“U Chairman ka NEDA toh u Amit Shah, wei waroh tip iyi i thong ka BJP/RSS. Ki wanrah ki yaka CAB (Citizenship Amendment Bill), da pyndam ki yaka Special Category Status ki jylla thaaiñ mihsngi kamjooh yaka Planning Commission iwa man i dooh nong ya ki paidbah ka thaaiñ,” da ong u Faleiro.
U AICC General Secretary da ong u wa ki dkhot ka NEDA toh u sñiawthooh wa lada pyrkhat ki du ya i myntoi wow yoh smat deiwa emlang wa ka liang wa synchaar emkaam ware ya ki wow pyrkhat jngai i wow jia lada emlang ha kam kani ka yatoh lok.
“Da pynyoo ki da i kaam kam haka CAB wa ka PRC ha Arunachal Pradesh, iwa daw pait hadooh katwon u yoh myntoi ka thaaiñ mihsngi ha ki sngi wow wan,” da ong u Faleiro.
Da kdaw u wa ka Congress nadooh u Pandit Jawaharlal Nehru hadooh ka Indira Gandhi, ki yaleh ki katwa ye wow yada wow pynneh pynsah yaka dustur riti yong ki paidbah kani ka thaaiñ.
Kam wow pynkynmoo wa ka National People’s Party (NPP) man ko leh kawi na ki dkhot ka NEDA wa yahkhmat da ka BJP.
Ka NPP kawa synchaar ha Meghalaya embynta lang ko wa ki sorkar ha Arunachal Pradesh, Manipur wa Nagaland.
U AICC General Secretary da pyntip u wa ki khubor wa em ki MLA ka Congress da sdang yaklam ki waka United Democratic Party (UDP) toh iwa bakla.
“Nga da yahcem O wa ki MLA wei waroh ki MLA ong ki wa man ki kiwa yatylli.” da ong u Faleiro.
Da pyntip u leh wa ha i yaklam u wa ki MLA ym em wa klam chaphang wow kylla ya uwa yahkhmat ka Congress Legislature Party (CLP).
U heh ka AICC da ong u leh wa hanlada ka Congress em ko katni ha i por wa chitom ha ka ri wa kamjooh khamtam ki jylla wei sam ki paidbah kiwa chitom ha kam kini ki por.
U Faleiro da kdaw u wa ki yaw ki haat nadooh ki karkhana hadooh ka rep ka riang da hiar ki, ka yoh nong ka ri leh ym em ko wei i dooh khih dooh khan ki bru dang joor chooh chooh ki bar ya ki por nachwa.
Chooh chooh da pyntip u wa ka Congress ha Meghalaya daw chong pyrkhat ko wow pynkhlan yaka Party wei lada emkaam u pynkylla ya i rukom krehkaam ka Party.
“Ym slem de daw lai i cha waroh ki chnong ki thaw yow pynkhlan yaka Party,” da ong u Faleiro.
Discussion about this post