Daw leh yeiwa emkaam pyrchah ya u MDC ka Nongstoin katkam ki kyndon ka aiñ: DC

Ka Deputy Commissioner ka West Khasi Hills, da pyntip ko wa da pynman ya i thung kreh Staff Nurse katkam ka Contractual Basis neibynta ka MCH ha Nongstoin deiwa pyndep ya ka Written Exam ha Nongstoin College ha ka 21 tarik u September 2026.

Ha kani ka Exam da em 60 ngut kiwa Pass kiwa da chah jied wow leh ya ka Personal Interview ha ka 29 wa 30 tarik uni u bnai ha Conference Room ka yung krehkaam ka Deputy Commissioner, Nongstoiñ.

Ynnin katwa dang pynman ya ka Personal Interview, u MDC ka Nongstoin, da psiah yabor u hapoh ka Interview Hall wei da sdang u wow klam khor ya ki dkhot ka Board iwa da pyntieñ ya ki kamjooh ya kiwa yaleh kreh wei hadien kattu katni por da khut ya oo cha kamra krehkaam ka Deputy Commissioner heiwa da pynbaad u har pa har yei rukom thung kreh deiwa kam leh wa i rukom thung kreh da mih i leh ha ki khubor.

Hajrong ini waroh ki bor District da beiñ joor ki yei leh u MDC wow pynthut yei rukom thung kreh neibhah ymye u pynthut ya ki dkhot ka Board iwa da pyntieñ ya ki, khamtam ya ki kyrtong kiwa da pynkhreh bha neibynta ka Exam wa ka Interview.

Related posts

Dawa ka HSYF na ka Fact-Finding Committee wow pyndam ya ka Public Hearing wa dadep pynman ka Shree Cement

September 29, 2026

Ki MLA ka NPP toh kiwa yatylli 101%: Prestone

September 29, 2026

Hajrong ini ki bor District dang bichaar bha ki yeini wei daw leh ki yeiwa emkaam katkam ki kyndon aiñ.

Ka Deputy Commissioner da ong ko leh wa lada em i sñiawkhia hajrong i rukom thung kreh ye ki wow e dei thoh wa bñiah chirup wa ki sabut cha ki bor wa emkaam deiwa ban wa lada em ki bru wa tip wa em i leh bakla wei i paan poisa ye wow thoh leh cha ka khnang wow leh yeiwa emkaam wei wow pynchitom ya ki katkam ka aiñ.

Chooh chooh da pynche ko wa i pynman ya ka Interview toh katkam ka Result (Merit) yong ka Written Examination heiwa ym emkaam u su katwa em hawa yaleh ya i kreh deiwa kyntu ya ki kyrtong wym toh u ngait ki ha ki bru wa kam wa em ki ha i bor wow yarap thung kreh. 

Da ban joor wa i khut yaleh kreh toh deiwa khooid wa suba wei da pyndep katkam i por wa da booh.

Da kyntu leh ya ki paidbah wow krehlang wa ki bor District khnang wow ye u pynkrehkaam noh ya ka MCH Hospital, Nongstoin wut-wut wow myntoi ki paidbah liang wanang.