U Montri Rangbah ka jylla uwa man leh u Chairman ka Meghalaya Democratic Alliance (MDA), u Conrad K Sangma da ong u wa da chimkhia bha u heiyatoh wa i leh u MLA ka BJP uwa man leh u Montri ha ka sorkar synrop, u Sanbor Shullai, heiwa da ong u wa da kular u wow leh yeiwa emkaam heiyatoh wa i jia ha ka 6 tarik uni u bnai.
Da ong u wa i leh u Sanbor Shullai deiwa wohnia katwa dang klam u Lamphang ka Yungdorbar Chna Aiñ, u Metbah Lyngdoh ha ka yalang wa wan ka kyrtong President ka NDA, da man iwa bakla wei i wym yahaap.
U Conrad da ong chooh chooh u wa i klam u Metbah toh ya ki mat yong ka jylla hakhmat ka kyrtong President, tangwa heitæ i por u Sanbor da wohnia u, iwa pynyoo yei wym sñiawsuk wei wymtoh khamtam hakhmat ki bru kiwa wan na baar.
Da ong u wa kam uwa yahkhmat ka MDA daw leh u yeiwa emkaam pyrchah ya u Sanbor kamwa da dawa da ka UDP, tangwa da kyntait u wow khana ya ki kaam wa ka MDA daw chim ko hajrong ini waroh.
Hawa kylli, chooh chooh da ong u wa ym em iwon iwon i yaphær ha ka MDA du neidaw wa uwi u dkhot da pynsñiaw u yei sñiawkhia katwa uwi won u dkhot da yieñ u wow pyrchah. Da ong u wa i pynyoo nia em bait i ha ka sorkar synrop tangwa iwa da jia ha ka 6 tarik ymtoh iwa sñiawsuk wei ymtoh iwa yahaap neibhah i por wa i thaw ymtoh iwa biang.
