Shillong: Ka seiñ kawa yarap ya ki bru wow ieh noh nei chah kdoh ha i dih kiad kawa tip kam ka Alcoholics Anonymous (AA) daw lehkmen ko yei daw 25 snem kani ka seiñ haka 23 tarik uni u bnai wow wan.
Kam chibynta wow pynpoor ya kani ka khubor, da khut leh ya kiwi wow chim ki ya kani ka luti wow sdang yei im wa thymme, ka AA daw pynman ko ya ka phyllu yumut ha ka 21 tarik uni u bnai wei da khut nadooh ki chynrang wa ki kynthai wow wan chimbynta lang kawa daw pynman ha NEHU Convention Centre, Shillong ha i por janmiet nadooh 6 waje hadooh 8 waje i miet.
Hawa yaklam wa ki laad pathai khubor ki bru kiwa da lait na i kjut dih kiad, da ong ki wa i dih kiad man ko i kjut wei emkaam wow pynchait ya uwa nongdih næ kawa dih.
Ka AA ka pynman ko ya i yasyllok man ka tayaw ya ki bru kiwa yaleh wow ieh yei kiad ha Don Bosco Square, Shillong wei lai syllok ko leh ya ki bru kiwa yaleh wow lait na i myllien wow dih kiad yow pynchlur ya ki wow wan ki cha khmat khlem iwon iwon i pynbor dei mon wa skhem yong ki hi.
Ya ka AA da pynkha chnat ha Meghalaya ha u snem 1994 wei em ki da ki spah ngut kiwa dih kiad kiwa da ye wow ieh noh ya i dih kiad lyngba i yarap ki para dkhot.
Da seiñ ya ka AA ha u snem 1935 ha Akron, Ohio, USA da u Bill Wilson wa u Dr. Bob Smith kawa da em katni ha kylleiñ ka pyrthai wa kynthup ha India.
Ha India em ki kamwa 2000 tylli ki thaw wa em ka AA wei ki dkhot ko ym duna ko ya 40,000 ngut.
Ha ka lehkmen dap 25 snem ka AA ha Shillong, daw em leh ki dkhot na Mumbai ki wow wan e mynsien kiwa da lait na i dih kiad.
Discussion about this post