Shillong: Ka Hynniewtrep A’chik National Movement (HANM) da maham ko wow pynman ya ka yakhih wa joor yow pynbor ya ka sorkar wow pynbait noh ya ki khappood wa ka jylla Assam, wei lada ka sorkar ym ye ko wow pynbait ha ki le snem wow wan ka seiñ ym chimbynta ko ha ka lehkmen dap 50 snem i yoh ya ka jylla Meghalaya.
“Lada i yaklam waka sorkar i wow man hadien ka 27 tarik uni u bnai ym mihsoh, neiliang ka seiñ u pynman i ya ka yakhih wa joor. U yang i le snem wei lada ka sorkar ym ye ko wow pynbait ya u pood u ang, daw khutlang ya ki paidbah wow dam u chimbynta ya ka lehkmen dap 50 snem i yoh ka jylla yong i neidaw wa ym em yumut i iyi iyi leh,” da ong u Lamphrang Kharbani, President ka HANM.
Ynne ka sngi ka HANM da pynman ko ya ka yakhih deiwa chong kyllaiñ myngor ha ka thaw pynyeiñ kari hajan ka Additional Secretariat, Shillong yow pynbor ya ka sorkar wow pynbait noh ya u pood u ang waka jylla Assam.
U President ka HANM da ong u wa ini toh i sdang i yakhun ka seiñ wow dawa na ka sorkar yow pynbait noh ya u pood u ang waka jylla Assam.
Da ong u leh wa u Prestone Tynsong heipor wa yalap Election u neibynta ka Election MLA 2018 i klam yong oo kiwa da mih khubor toh wa ka NPP manda poi ko hei bor u pynbait noh ko ya u pood u ang, wei ka NPP katni da yoh ko wow yahkhmat syndon ya ka sorkar ha ka jylla wei da toh u pynbait syndon yei eh i khoo cha khappood.
Heijooh i por da ong u wa ka sorkar jylla toh u kyntu ko ya ki District Council wa kiwa synchaar nadooh ki Syiem wa ki Rangbah Shnong wow pynbiang ki ya ki kot ki sla wow pynsakhiat yei man tre thaw deilang wa ki Map.
Discussion about this post